Neymar awm lo a pawi - Lianzuala

AFC Champions League-ah zanin hian Mumbai City an inlan dawn a, Neymar-a khelhna Al Hilal nen zan dar 11:30-ah an intawng dawn. Mahse, international break-a a hliam vangin Neymar a inlan dawn lo a, Mumbai player-ten khawvela footballer langsar ber pawl hmachhawna chance an neih chu uiawm takin a thamral.

Lianzuala chuan, "Neymar-a'n khel ve ngei se, kan tan chuan duhthusam a ni," a ti a, an beiseina a thlawn a chan thu a sawi. Mahse, Al Hilal hian Chelsea defender hlui Kalidou Koulibaly, Wolverhampton Wanderers captain hlui Ruben Neves, Serbian striker ṭha Aleksandar Mitrovic leh Lazio midfielder hmuhnawm ṭhin Sergej Milinkovic-Savic an kawl a, an si ban nghaktu pawh Sevilla keeper hlui Yassine Bounou a ni.

A tawi zawnga sawi chuan Al Hilal hi European club ṭha tak ang an ni a, Lianzuala te tan a awlsam dawn lo. Lunglei forward chuan, "Asia khawmualpuia club ṭha zinga mi an ni a, a awlsam loh turzia chu kan hrechiang. Mahse, result ṭha hmu ngei turin theihtawp kan chhuah ang," tiin Vanglaini a hrilh.

Mumbai tan Lianzuala bakah Lalengmawia Ralte (Apuia) chu inkhel bul ṭan tura beisei a ni a, football 'star' rual hmaah an theihna tak tak fiahin a awm dawn. Mumbai hian match hnih an khelh tawhah chak an la nei lo a, zanina an hmachhawn tur Al Hilal hian match hnih aṭangin point li an nei tawh thung.