South Africa-in England an sawp

Cricket World Cup 2023-ah England-in beisei an phak thei lo a, Ben Stokes lo kir pawhin awmzia a nei lo. Inrinni khan South Africa lakah run 229 zetin an mualpho a, Three Lions tan semifinal khelh beiseina a tlem sawt.

Wankhede Stadium, Mumbai-a inkhelah ṭhum vawra vannei zawk England-in bat hmasak an thlang a, duh an thlang sual. Proteas tan opener Quinton de Kock chuan run li siamin out nghal mah se, batter dang an rawn che ropui.

SA tan hian Reeza Hendricks (85 runs), Rassie van der Dussen (60) leh Aiden Markram (42) te an che ṭha a, Heinrich Klaasen chuan run 109 zet vaw chhuakin, run 75 siama a tawp thleng dam Marco Jansen pawh a che ṭha hle.

Proteas hian over 50 a thlen meuh chuan run 399 siamin wicket sarih an hloh a, England tan a huhphurhawm takzet. Three Lions bat hun a thleng a, an ropui lo hle - run 43 siamtu Mark Wood chu a siam hnem ber a ni!

Batter dang zingah run 40 siam kai an awm lo a, over 22-ah run 170 chiah siamin an out vek a, Proteas tan Gerald Coetzee chuan wicket thum a la - run 229-in England an mualpho a, hliam dam hlim Stokes pawhin run nga bak a siam lo.

Inrinni inkhel hmasa zawkah Sri Lanka chuan wicket ngaa Netherlands hnehin, tun inelnaa a vawi khat nan an chak a, Zirtawpni khan Australia chuan run 62-in Pakistan an hneh bawk.