Ramos telna Sevilla-in Real an chelh

Real Madrid captain hlui Sergio Ramos-a'n Sevilla jersey ha chungin a club hlui a hmachhawn a, Seville khawpuiah chak zawk awm loin an inṭhen - team pahnih hi 1-1 in an inhnehtawk.

Mualneitu Sevilla hian David Alaba 'own goal' hmangin hma an hruai a, goal an khung hi minute 74-na a nih tawh avangin chak beiseina pawh a sang hman viau.

Mahse, Real-in minute li hnu lawkah Dani Carvajal hmangin an sut ve leh a, hun tawp thlenga goal dang lut tawh loin 1-1 in an inhnehtawk - Madrid khaw club hian table chung ber erawh an la luah chhunzawm zel.

Goal...leh lo!

Inkhel ṭantir lamah Real an vanduai. Minute ngana lekah Federico Valverde chuan goal hmahruai a khungah a inngai a, mahse, video assistant referee hmanga ennawn a nih hnuah goal hlawh chhuaktu Jude Bellingham chu a lo offside a, goal-ah pawm a ni lo.

Real hi a vawi hnih nan an vanduai nawn - an goal khung pawm a nih loh aṭanga minute thum hnu lawkah Jude Bellingham chuan a khung leh a, mahse, tun ṭum erawh Valverde offside vanga referee-in foul a lo ham tawh avangin Bellingham goal khung hi pawm a ni chuang lo a, Sevilla an hahdam nawn!

Mahse, mualneitu hi an hnufual reng duh bik lo. Chance an nei ve zui - Ivan Rakitic-a khung ngei tur nia lang chu Carvajal chuan line aṭangin a lo pet chhuak hman a, Lucas Ocampos chance neih ṭhat pawh Kepa Arrizabalaga chuan a dansak.

An insem

Real tan Vinicius Junior leh Rodrygo ten an chance neih an chhawr lo a, second half-ah Sevilla chuan goal an khung hmasa zawk. Marcos Acuña-a ball cross ṭha tak chu Youssef En-Nesyri nen an inchuhna lamah Alaba chuan an lamah a tilut!

Sevilla hlim chhung erawh a rei lo. Real tan goal an chhuah aṭanga minute li hnu lawkah Carvajal a inlar a, Toni Kroos-a freekick aṭanga ball kal chu an si phurh sutna goal ni turin a tauh lut ve leh a, 1-1 a ni.

Real lakah Ramos a khel ṭha takzet a, Spanish defender hian vawi tam Real tlarhma tibeidawngin block leh petchhuah a ngah êm êm a, kum 37 mi defender hian a kum tam deuh tawh mah se top level khel turin theihna a la nei reng tih a pholang.