Juventus mawina Paulo Dybala

Paulo Dybala goal hnih bakah Gonzalo Higuain leh Douglas Costa te goal hmangin Juventus chuan Udinese 4-0 in an sawp a, harsatna tawk loin Coppa Italia quarterfinal an lut.

Nilaini zan last 16 inkhel dangah AC Milan leh Fiorentina te pawhin an khingpui ve ve hnehin a thiam pariat zingah a inhlangkai ve bawk. Nizan khan AS Roma leh Parma an inhmachhawn ve leh a, a chak zawk hian quarterfinal-ah Juve an hmachhawn leh ang.

Damlohna vangin Cristiano Ronaldo chu hun tepter tawh takah squad aṭangin a inhnukdawk a, Juve tan an goal khung khawl tel lo hi buaina tur a awm chuang lo - ball thiam leh goal khung thei Paulo Dybala tan hun ṭha a inher chhuak ve thung.

Allianz Stadium-a inkhelah minute 16-na lekah Argentine striker pahnih Dybala leh Gonzalo Higuain ten Udinese tlarhnung an chhaih buai hnuah player naupang zawk Dybala chuan a hmawr bawkin Turin club hma a hruaipui.

Udinese keeper Nicolas Andrade-a’n Federico Bernardeschi a tih tluk vangin penalty a chawi a, goal hmahruai khungtu Dybala chuan a goal hnihna khung nan a hmang. Argentine striker hian an match hnuhnung pahnihah penalty vawi hnih a hlawh a, mahse Ronaldo-a’n a pet - tun ṭumah erawh a pettuah a ṭang ve thung.

Second half-ah pawh Juve bawk an chungnung, defender Matthijs de Ligt-a goal khung tur chu keeper Nicolas chuan ṭha zetin a dansak a, Higuain a goal khung hmasa zawk chu VAR hman a nih hnuah offside vanga pawm ni lo mah se a hnuhnung zawk chu sawisel bo a ni; Douglas Costa chuan penalty aṭangin chak nemnghehna a khung leh bawk.

Juventus manager Maurizio Sarri chu a naute khelh danah a lawm a, a bik tlakin tlarhma lama Gonzalo Higuain leh Paulo Dybala te inkawp chu fans lam pawhin thlir manhla an tih ngei a rin thu a sawi. Italian manager Sarri chuan, “Ronaldo kha tun hnai ni hnih chhung chu sinus vangin a buai a, chawlh a mamawh. Ani awm lo mah se tlarhma lamah ka naute mittlung takin an khel a, fans lam pawhin ticket an lei chhan chu an hmuh ngei ka ring.

“Player zawng zawng an khelh ṭhat hi chuan a hlimawm ṭhin,” a ti. Serie A lama chhawr loh Emre Can chu Coppa Italia lamah pawh chhawr a ni chuang lo a, manager Sarri hian German midfielder a chhawr loh chhan chu a chhuah dawn vang ni loin an ṭhat dan tura a naute a rem vang a nih thu a sawi.

League match an khelh hnuhnungah Higuain-a’n Dybala a rawn thlak a, khelmual a chhuahsan dawnah Dybala a lawm lo tih a lang. Coppa Italia lamah erawh Argentine striker hi khelh duntir an ni. Real Madrid striker hlui Higuain chuan, “Theihna nei sang bik nena khelh dun chu a nuam,” a ti.

Zlatan Ibrahimovic an lakluh avanga ngaihven hlawh thar AC Milan chuan an mikhual SPAL 3-0 in an hneh. San Siro-a inkhelah Milan tan hian Krzysztof Piatek-a’n goal hmahruai a khung hnuah Samuel Castillejo leh Theo Hernandez ten an khung belh bawk.

Striker palian Ibrahimovic-a’n league match hnuhnungah goal khung leh tawh mah se SPAL lakah chuan bench lamah hun hman tluantir a ni a. Swede striker hi kum 38 mi a nih tawh avangin match zawng zawngah an chhawr tawh lo ang.

Season hmasa aṭanga team khawng ṭha tak Atalanta chu an elpui Fiorentina lakah 2-1 in an chak lo. Wolves aṭanga loan hmanga an hawh Patrick Cutrone chuan Fiorentina tan minute 11-naah goal hmahruai a khung. Mikhual Atalanta lamin Josip Ilicic hmangin an chhanglet a, minute 70-naah Fiorentina defender German Pezzella chu a tluk der avangin hnawhchhuah a ni a, an dinhmun a ṭha lo hret. Mahse, hun tawp hma deuhin Pol Lirola chuan chakna goal a khung a ni.