Ukraine-a zin tur City; PSV hmaah Atletico
UEFA Champions League nghakhleltute tan zaninah inkhel pahnih a awm dawn. Zanin dar 1:15-ah Manchester City chuan Champions League last-16 khel turin Ukraine club Dynamo Kiev an lenchilh ang a, dar 1:15-ah vek Atletico Madrid leh PSV Eindhoven an inhmachhawn bawk ang. City inkhel hi Ten Action-ah a en theih ang a, Ten Sports-ah Atletico leh PSV inkhel tihchhuah a ni bawk ang.
City tan fiahna
Manchester City-in FA Cup fifth round-ah Chelsea 5-1 in an hneh lo a, an mualpho. Stamford Bridge-a naupang rual hruaitu Manuel Pellegrini-a'n Champions League an ngaihpawimawh zawk vang a nih thu a sawi a, zan-inah an ngaihpawimawh inelna an hma-chhawn dawn e.
City hian season thum chhung Champions League last 16 a zawna an luhna a ni a, last 16 an luh hnuhnung pahnihah Barcelona an hmachhawn avangin quarterfinal an thleng zo lo. English club tan zanin hi an club chanchina quarterfinal an luhna hmasa ber remchang a ni.
Champion beisei Hart
City keeper Joe Hart erawh a inringtawk a, quarterfinal mai ni loin champion hial beisei ngam tur an nih thu a sawi.
English keeper chuan, "Quar-terfinal chauh kan thlir tur a ni lo, champion hial kan beisei ngam tur a ni a, chu chu kan beisei ngam dawn lo a nih chuan Kiev khawpuia zin hi kan tan a ṭulna a awm lo," tiin a teammate-te a fuih.
Hart chuan sawi chhun-zawm-in, "Champion turin theihna kan nei tih hi kan hriat a ngai. Champions League-ah chuan club ṭha ber ber an inlan a, theihna zawng zawnga khel lo tan hmun a awm lo," tiin Dynamo Kiev an hmachhawn hunah tih mai mai an tum loh thu a sawi.
Team pahnih
Kum 2011 khan team pahnih hi Europa League last 16-ah an lo inhmachhawn tawh a, vawi khat ve ve hnehna an chan hnuah goal khung hnem zawk Kiev an tlang a, hemi hnu hian team pahnih an inhmachhawn leh tawh lo.
City-in inkhel an hma-chhawn hnuhnung pangaah vawi hnih chiah hnehna an chang a, match hnuhnung pathumah a zawna an tlawm vek avangin team boruak ṭhat lai a ni lo.
Dynamo Kiev-in match an hma-chhawn hnuhnung pangaah vawi thum hnehna an chang a, vawi khat an khingpuite inhneh-tawk-puiin vawi khat an tlawm thung.
Tute nge inlan dawn?
Manchester City damdawi in lun lai a ni a, hliam vangin Samir Nasri, Wilfred Bony, Eli-quiam Mangala, Jesus Navas, Kevin De Bryune, Fabian Delph leh Bakary Sagna-te chu an chhawr thei dawn lo vek.
Ukrainian club tan hrem vangin left back Vitorino An-tunes a inlan thei dawn lo a, hliam vangin keeper Olexandr Rybka dinhmun a chiang lo bawk.
Dynamo Kiev tan an player pawimawh Andriy Yarmolenko chu inhliam mah se a inlan theih tawh beisei a ni a, City tan hei hi chanchin lawmawm a ni lo.
Ukrainian forward hian tun season-ah inelna hrang hrangah match 22 khel tawhin goal 13 a khung tawh a, assist vawi kua lai a nei bawk.
PSV khelmualah Atletico
Spanish club Atletico Ma-drid-in an league match hnu-hnung berah Villarreal chu goal khung loin an inhnehtawkpui a, zaninah insiamṭhatna remchang an nei dawn.
Hetihlai hian PSV Ein-dho-ven-in tih mai mai an tum dawn bik lo. Dutch club midfielder Jorrit Hendrix chuan, "Kan khel-muala khel tur kan nih avangin fan-te ṭawiawmna kan dawng ṭha dawn a, fan-te min auh phurna ringawt pawh hi chakpui tham a ni ṭhin. Atletico hi team ṭha tak an ni a, mah se kan khelmuala kan tih theih hi lo hriattir kan tum a ni," tiin Spanish club chu hneh ngei an tum hle.
Team pahnih
Kum 2007-a last 16 an luh hnua Champions League last 16 lut ve leh chiah PSV hian tun hnai an match pangaah vawi li hnehna an chang thei a, vawi khat an tlawm thung.
Season thum chhung a zawna Champions League last 16 lut thei Atletico Madrid-in match an hmachhawn hnuhnung pangaah vawi hnih hnehna an chang a, vawi khat an khingpuite an inhnehtawkpui a, vawi hnih an tlawm.
Team pahnih hi Champions League group stage match-ah 2008 khan an lo inhmachhawn tawh a, vawi hnih an inkhelhah Spanish club-in hnehna chang ve vein an chungnung zawk.
Tute nge inlan dawn?
Atletico Madrid tan chan-chin lawmawm a awm a, hrem vangin tun season-a inelna hrang hranga match 32 a inlana goal 23 khungtu PSV striker Luuk de Jong a inlan thei dawn lo. Dutch club tan winger Maxime Lestienne chu hliam vangin a dinhmun a chiang lo bawk.
Spanish club tan Augusto Fernandez leh Tiago-te chu hliam vangin an la inlan thei dawn lo a, hliam vanga rei tak an chawlh hnua Villarreal laka lo kir leh Diego Godin leh Stefan Savic-te chu Atletico tlarhnungah inkawp thei tura beisei an ni.