Bolton Wanderers-in neitu thar a nei

Championship club Bolton Wanderers chuan neitu thar a nei a, an club striker hlui Dean Holdsworth-a kaihhruai Sport Shield consortium chuan pound maktaduai 7.5-in an lei.

Bolton leina man zat atana Sport Shield consortium-in an sen zat hi pound maktaduai 7.5 ni mah se kum nga chhungin pound maktaduai 12.5 pek belh tura tih a ni a, Dean Holdsworth chuan club chairman dinhmun a chelh ang.

Premier League-ah pawh club vantlang pawl lo ni tawh ṭhin Bolton hi tun hnaiah sum vangin an talbuai fo a, High Court chuan January thla khan HM Revenue & Customs lakah English club hian pound maktaduai 2.2 vel an ba niin an tarlang a, club leiba neih zawng zawng zat hi pound makta-duai 172.9 vel nia tarlan a ni.

Bolton-in kum 1997-a an club chanchina player man to ber ni tura pound maktaduai 3.5-a an lo lei tawh Dean Holdsworth chuan hun rei tak chhung club neitu lo ni tawh Eddie Davies chu president a nih chhunzawm zel tur thu a sawi a, sum leh pai chevelah erawh a inrawlh loh tur thu a sawi.

Neil Lennon enkawl-na hnuaia khel Bolton hi Championship-ah a hnuai ber dawttuah an awm mek a, season thara Cham-pionship khelh chhun-zawm turin an dinhmun a chhe hle.