AC Milan-in Napoli an chelh

Thawhṭanni zan Serie A inkhelah champion tum Napoli chuan league hmahruaitu nih theihna hun ṭha an neih an hmang ṭangkai thei lo a, an mikhual AC Milan nen 1-1 in an inhnehtawk.

Napoli hian hmahruaitu Juventus lehpelh theihna hun ṭha an nei a, mahse point khat chiah an hmuh tak avangin league table-ah pahnihna dinhmun an luah a
ṭul rih. Point 58 hmutu Juve chu point khatin an phak lo mek a ni.

Stadio San Paolo-a inkhelah Napoli hian kum 1990 hnua a vawi khat nan Serie A title lak an tum tih a chiang, Europa League-a an hahchawlh tir Gonzalo Higuain leh Lorenzo Insigne te khelmual chhungah kan hmu.

Italian attacking midfielder Insigne hian minute 39-naah yard 25 a hla aṭangin goal hmahruai a khung. Mahse, Napoli fan-te an hlim rei lo, goal an khung aṭanga minute nga hnu lekah Giacomo Bonaventura chuan Milan tan an si phurh a sut a, goal dang a lut zui tawh lo.

Milan manager Sinisa Mihaj-lovic chuan, "Inkhel hautak kan hmachhawn zawn a, Fiorentina, Inter Milan leh Napoli lakah point kan hlawh chhuak vek. A zawna match sarih chhung kan tlawm tawh loh avangin season tawpa a sang pathum zinga tel kan beisei ngam tur a ni," tiin season thara Champions League khelh a inbeisei.

Milan hian point 44 hmuin table-ah parukna dinhmun an luah a, pathumna Fiorentina chu point riatin an phak lo mek a, hmahruaitu Juve erawh point 14 zetin an phak lo thung.

Napoli coach Maurizio Sarri chuan, "League-ah a zawnin chakni hmel kan hmu lo a, Higuain-a'n tun season-a a vawi khat nan a zawnin match hnihah goal a khung lo bawk. Mahse, heng avang hian lungngaih tur a ni lo a, kan vanneih tawk loh vang chauh a ni. Kumtluanin 100% a ṭhain a khelh reng theih loh. Ṭha taka kan khelh chhunzawm chuan result duhawm zawkin min lo hmuak ngei ang," a ti.