Mizoram hnung zuitu Assam

Santosh Trophy Qualifier North East Zone Group B-ah Assam-in an khingpuite hneh vekin final round khel turin an tling. Nimin chawhnu inkhel pawimawh takah Assam-in minute 7-naa Nabin Rabha goal hmangin Meghalaya chu 1-0 in an hneh.

Goal khat

Assam-in final round lut tur-in chak an mamawh a, goal difference nei ṭha zawk Me-ghalaya tan draw a tawk. Inkhel an ṭan a, dinhmun ṭha zawk Meghalaya an talbuai zawk a, Assam-in goal an khung nghal.

Minute 7-na lekah Assam striker Jinngbla Brahma-a'n chance ṭha chu a finishing ṭhat tawk loh avangin khung lomah se ball per chu Nabin Rabha-a'n kawh zetin a pet lut a, Meghalaya keeper Padam Chhetri tan tih theih a awm lo.

Meghalaya-in an si phurh sut tumin an nawr a, goal chance
ṭha erawh an insiam thei lo. First half tawp hma hretin Assamese winger Nabin Rabha-a'n goal hnih khung theihna hun ṭha a nei a, hnai tak aṭangin ding lam
aṭanga cross ball chu goal zawnah a pet thei lo.

Goal mamawh Meghalaya-in second half an thunun tluan a, goal erawh an khung thei chuang lo. Samson Nongrum cross ṭha tak chu Maitshaphrang Nengnong-a'n hnai tak aṭangin a khung lo. Hun tawp lamah corner kick aṭanga ball kal chu Victor Shadap-a'n a tauh over bawk.

Minute 84-naah Jessy Vanlalmuana a rawn inlan a, Assam-in goal an neih tawh avangin Lunglei forward tan hna pawimawh thawh tur a awm tawh lo. Assam-in goal an chhuah lo a, point kua hmuin kum zawnin Santosh Trophy final round an lut.

Eng nge an sawi?

Meghalaya coach Lalhming-thanga Darlong chuan, "Draw chauh mamawh mah ila kan player-te a talbuai zawkah an ṭang a, goal kan chhuah hma lutuk kan tuar a ni. Goal chance kan neih ang kan khung lo a, kan vanduai ve bawk a ni," tiin Vanglaini palai a hrilh.

Mizo coach Hminga chuan sawi zelin, "Mizoram Football Association-in ṭha takin min thleng a, ei tur ṭhate leh mutna tur hmun ṭha takte min pek avangin an chungah kan lawm takzet a ni," a ti.

Assam coach Kamlakamta Singh chuan, "Team ṭha zawk Meghalaya kan hneh avangin kan lawm takzet a ni. Tunah chuan kan rilru zawng zawng final round-ah kan dah thei tawh ang. Inhliam vangin final round atan hian player pakhat chu kan thlak a ṭul ang. Assam hian semifinal thlen phak ngei kan tum a ni," tiin a sawi.

Mizo striker Jessy chung-chang sawiin Assam boss chuan, "Jessy hi Assam League-ah a khel ṭha em em a, striker ṭha tak a ni. A chak ṭhat avangin goal khung turin a ṭha a, defensive game erawh a la inzir deuh a ngai ang," tiin a sawi.

Group B inkhel dangah Naga-land-in Rhitso Mero leh Imlong Chaba Chang te goal hmangin Tripura 2-0 in an hneh a, Tripura chu point hmu lo awmchhun an ni.