United-in Shrews hnehin quarterfinal lut

FA Cup fifth round-ah Manchester United chu last 16 lut pha zinga team chhe bera ngaih Shrewsbury Town nen pawh fuh an ni a, Thawhṭanni zan khan Louis van Gaal-a hoten harsatna nei loin League 1 club Shrews hi 3-0 in an hneh.

Red Devils hian quarterfinal-ah 5-1 zeta Blackburn Rovers sawptu West Ham United an hma-chhawn dawn. Premier League club pahnih hi Old Trafford-ah an inkhelh dawn avangin Man-chester United-in Wembley Stadium an thleng a nih pawhin result mak a ni lo ang.

Ṭhat dan berin

Season tawp ruala Manchester City manager hna chhuahsan mai tur Manuel Pellegrini-a'n FA Cup nomawi chawi a tum lo tih a chiang. Chilean manager hian Guus Hiddink-a hnuaia harh tharna chang mek Chelsea lakah City rawlthar player-te khelhtirin 5-1 in zetin an chak lo.

City ṭhenawm club United manager Louis van Gaal erawhin result hmangin a hna chelh lai a la humhim theih tih a hria a, League 1 club lakah chetsual tum loin player ṭha a luhtir. United hian Shrews lakah harsatna an tawk lo a, minute 37-naah Chris Smalling-a'n goal hmahruai a khung a, first half tawp hmain Juan Mata-a'n freekick a khung leh bawk. Darkar khat hnuah Jesse Lingard-a'n United goal thumna a khung a, goal dang luh belh tawh lo mah se chak phu zawkin hnehna an chang.

Shrewsbury Town hian kum 2003 khan Kevin Ratcliffe-a enkawlna hnuaiah Everton chu FA Cup third round-ah an lo bara-khaih tawh a, Toffees leh Shrews inkarah hian club 80 zet an awm. Kum 10 chuang hnuah Shrews-in hmasawn lam pan mah se United nen an inkarah club 59 zet an awm avangin club pahnih an la inthlau lutuk hret a ni.

Eng nge an sawi?

Manchester United manager Louis van Gaal chuan, "Minute 70 chhung ṭha taka kan khelh avangin ka lawm hle a ni. Amaherawhchu minute 70 hnuah player 10-a kan khelh avangin ṭha taka khelh a har tawh. Mi zawng zawngin United tan chuan Shrewsbury chu hneh ve tur alawm an ti ngei ang, an sawi dik ngei e. Player-te nen kan lawm-na zawk erawh FA Cup quarterfinal kan lut hi a ni," tiin a sang pariat zinga tel phak hlut zia a sawi lang.

Thawhṭanni zan inkhelah hian minute 76-naah Will Keane chu inhliam vangin a inkhel chhunzawm thei lo a, United-in substitution an hman zawh tak avangin player 10-in an khel tluan.

An hmabak sawi zuiin Dutch manager chuan, "Inelna hrang hrangah beisei tur kan la nei vek. Premier League-ah point ruk chauhin Manchester City kan pha lo a, hmabak chu harsa deuh mah se champion tur beiseina hi kan la nei nual a ni," a ti.

United khelh dan hi an khing-pui coach Micky Mello-a'n a fak a, amaherawhchu Van Gaal hote hi an tiat pui club lakah fak tlakin an khel ngai meuh lo. Red Devils hian Ningani zanah first leg-a 2-1 a an hneh loh Danish club Midtjylland an mikhual dawn a, Pathianni zanah Old Trafford-ah tho Arsenal an hma-chhawn leh nghal ang.