Arsenal-in Premier League lam an hawi thei ta

Tun hnaia Premier League club ṭha ber Arsenal tan La Liga club ṭha ber Barcelona an ṭha lutuk hret a, Emirates Stadium-a goal hniha an chak loh avangin league lama an ngaihtuahna zawng zawng sen chu Gunners tana ṭha ber niin a lang.

Lionel Messi-a'n tun hmain Petr Cech-a goal venah a la pet goal ngai lo a, Thawhlehni zanah erawh Argentine forward Messi-a'n goal hnih a khung a, chutichung chuan Chelsea keeper hlui hi a khel ṭha hle. Gunners boss Arsene Wenger-a'n quarterfinal-a Catalan club luh theihna chance chu 95% lai a nih tawh thu a sawi a, Nou Camp-a second leg an khelh hunah an ṭhat theih dan bera an luh kher a rinawm tawh loh.

Messi, Messi

French manager Arsene Wenger-a'n point hlawhchhuah ngei tumin player a rem a, Barcelona attacking trio Lionel Messi, Luis Suarez leh Neymar te meuh pawhin Arsenal tlarhnung an su tlang thei lo a, keeper Cech-a khelh ṭha tel tih hria a ṭul bawk.

Minute 71-naah Barca-in counter attack hmangin an vaw let a, Neymar leh Suarez te'n chak takin ball an la phei a, Arsenal-in concentration an hloh zeuh bawk avangin Messi-a'n 'cool' takin Catalan attack hmawr a bawk.

Goal luh hnuah Arsenal an chesual nawn a, substitute Mathieu Flamini chuan second 47 lek khelmual chhunga a awm tihah Messi lakah fimkhur loh vangin penalty a chawi a, Argentine forward hian penalty aṭangin a goal hnihna a khung.

Barcelona-in goal thum khung theihna hun ṭha an nei a, Neymar-a tauh goal tur chu Gunners keeper Cech-a'n a dang a, Uruguayan goal khung khawl Suarez-a'n hnai tak aṭangin goal ban a pet per bawk.

Laipui a tlawlh

Arsenal player-te'n an khelh dan an en let hunah an chak teuh zia an hmu ang, an tlarhma hriam se chuan goal khung hmasa thei tur an ni. First half-ah Alex Oxlade-Chamberlain-a'n an khelhpui Barcelona ni lo se goal khung theih ngeina tur chance a nei a, mah se Catalan club an tum tlat avangin Chamberlain-a'n hnai tak aṭangin keeper Marc-Andre ter Stegen zawnah tak a pet.

Second half-a Olivier Giroud ball tauh chu German keeper Ter Stegen-a'n a dan sak a, French striker hi Premier League stiker ṭha tak ni mah se world class striker a ni em? tih erawh zawh nawn a ngai fo. Arsenal hian an chance ṭha tak vawi hnih an nei a ni ringawt lo a, inkhelh ṭan aṭanga darkar chanve chhungin Barca-in mualneitu penalty area-ah vawi hnih chiah ball an khawih a, Gunners erawhin vawi 11 zet ball an khawih thung.

Goalkeeper Cech bakah Nacho Monreal leh Aaron Ramsey-te Arsenal tan an langsar a, Oxlade-Chamberlain, Mesut Ozil leh Alexis Sanchez te'n an theihna an pho chhuak thei lo. Arsenal tan an khelh danah zah tur a awm lo a, kar thum hnuah khelh hmabak khel zo turin Nou Camp an tlawh ang. Tuna a lan dan mai chuan a zawnin kum ruk chhung chu quarterfinal an thleng pha dawn lo niin a lang.

Eng nge an sawi?

Barcelona boss Luis Enrique chuan, "Sawisel tur pakhat mah ka nei lo a, minute tin kan khelh danah khan ka lawm a ni. Result ṭha tak kan hlawh chhuak a, quarterfinal erawh kan la lut chiang lo," tiin result a la inthlak theih thu a sawi.

Arsenal manager Arsene Wenger chuan, "Barcelona hi team ṭha tak an ni a, kan theihna zawng zawngin khel mah ila kan chet vel dan erawh player naran khelh dan chauh a ni. Inkhel kan thunun zawk nia a lan laia goal kan chhuah kha pawi ka ti takzet a, tun
ṭuma kan tihsual ang bawk hian nikum khan Monaco nen kan inkhelh ṭumin kan lo tisual tawh a ni. Dik taka sawi chuan kan hmabak hi a harsat tak zet tawh a, quarterfinal thlen hi thil theih tawh loh ang hial a ni tawh," tiin an khelh ṭhat tawk loh thu a sawi.

Hmabak chu

Arsenal-in kum 2004 hnuah Premier League nomawi an chawi leh tawh lo a, Pathianni hian league-ah Manchester United an hmachhawn dawn. Gunners hian point hnih chauhin hmahruaitu Leicester City an pha lo a, tun ṭum hi champion-na hun ṭha a ni. FA Cup-ah Arsenal hian Hull City nen replay an khel dawn a, an chak chuan quarterfinal-ah Watford an hmachhawn ang.

Barcelona-in match 33 chhung competitive match-ah hneh loh an tawng tawh lo a, Spanish team tana record nei
ṭha ber chu Real Madrid niin 1987-88 season khan match 34 chhung hneh loh nei loin an kaltluang. La Liga hmahruaitu Barca hian Pathianni hian Sevilla an mikhual dawn a, record siam turin an dinhmun a ṭha hle.