Mizoram kan tum dawn chuan kan lawm ṭhin - Tripura coach
Mizoramin 2016 Santosh Trophy Qualifier North East Zone a thleng a, football lama sulhnu nei ṭha tak tak fuan khawm zingah Tripura coach Rajat Ghosh Dastidar thusawi leh chanchin a ngaihnawm hle - ISL 1-a Atletico de Kolkata champion ṭuma an manager kha a ni.
Tu nge Rajat Ghosh?
Kum 2002 khan Stephen Cons-tantine kaihhruai Indian U23 Natio-nal Team chu Vietnam-a khelh LG Cup-ah an champion a, goalkeeper Rajat Ghosh chu goalkeeper of the tournament-ah thlan niin senior player pathum zinga mi captain Baichung Bhutia chuan man of the match award a dawng thung.
Indian zingah Rajat Ghosh hi ram pawna best goalkeeper chawimawina dawng thei awm chhun a la ni a, ani hi tun ṭuma Tripura coach a ni.
Rajat Ghosh hi TFA Academy awm tura thlan ni mah se zirna lam a ngaih pawimawh avangin India rama football zirna ṭha berah hian a awm rei lo a, MBA a zir chhunzawm. Amaherawhchu Bengali tlangval Rajat Ghosh hian football lam a luhchilh ta tho a, Indian ram club ṭha East Bengal (Kum 6), Mohun Bagan (4), Salgaocar (3) leh ONGC tana a khelh bakah ram tan vawi eng emaw zat a inlan bawk.
Rajat Ghosh hian tunah chuan AFC B Licence a nei tawh a, Atletico de Kolkata-in Indian Super League hmasa ber an champion khan manager a ni. National Games hnuhnung berah khan West Bengal coach a ni a, champion ta Mizoramin Rajat-a enkawl West Bengal hi group stage-ah 2-0 in an hneh.
Rajat Ghosh hian ONGC-ah Hu-man Resource Executive Officer hna a chelh avangin Tripura-ah sawn a ni a, Santosh Trophy Qualifier-a Tripura a enkawl chhan pawh a hna vang a ni.
Tripura a sel
Tripura-in qualifier match thum an khelhah an chak lo vek a, amah-erawhchu Rajat Ghosh chuan inelna
ṭan hmain an team ṭhat loh thu hi Vanglaini palai a lo hrilh tawh.
India keeper hlui Ghosh chuan, "Ni sarih chiah kan inpuahchah a, Santosh Trophy khel tlak kan ni lo. Player 41 tal min pe turin State FA hruaitute ka hrilh a, player 26 chiah min pe thei a, chu chuan kan team dinhmun hi a tichiang. Goal thuma kan chak loh pawha lawm ṭhin kan nih chuan insiam-
ṭhat a ngai, football-ah chuan result a pawimawh ber," tiin Tripura in hmasawn an mamawh thu a sawi.
Ghosh chuan, "Tripura a min sawn tirh khan football tihhmasawn inbeiseiin ka kal a; amah-erawhchu Tripura hrec hiang ka ṭhiante chuan mak an ti vek. Ka hna-thawhna hmun ka thlen hnuah thil awm dan ka hria a, Tripura chuan State FA aṭanga insiamṭhat an mamawh a, Mizoram aṭang hian inzir tur tam tak a awm a ni," tiin a sawi.
Mizoram a fak
Lammual-a S. Malsawmtluanga Stand lam hawi pahin Ghosh chuan, "Mama-te nen hian East Bengal-ah kan khel ho ṭhin a, player kawm nuam leh ṭha tak a ni. Ani kha Mizo tan bul ṭantu a ni a, khatih hunlaia Mizo player zat leh tuna India ram league sang bera Mizo player awm zat chhut hian Mizoram hmasawnna hi a mak zawk a ni," tiin Mizoram hmasawnna a sawi lang.
Tun hmaa Mizoram a hmuh dan sawi zuiin, "Santosh Trophy hi vawi tam tak ka khel tawh a, West Bengal aiawhin ka khel tam ber. Kum 10 vel liam ta kha chuan Santosh Trophy-a Mizoram kan hmachhawn dawn chuan kan lawm ṭhin a, point thum hmuhna ringawtah kan ngai lo - goal difference siam ṭhatna turah kan ngai. Chu chu thil awm dan dik tak a ni. Tun hnuah erawh Mizoram hi India rama state ṭha ber an ni tawh a, National Games-a kan hneh loh ṭuma an game khelh dante kha a mawi takzet a ni," a ti.
Ghosh hian Mizoram chu fak chhunzawmin, "Tlang ramah ground ṭha tak a awm thei a, State FA a chak em em bawk. Hetiang state hi Tripura chauh ni lo, India ram state hrang hrangin an entawn tur a ni," tiin a sawi.
Mizoram hian kuminah Santosh Trophy final round khel turin Manipur an hneh. 2014 champion hian nikum khan semifinalah inelna thlengtu Punjab chu penalty shootout-ah an hneh lo. Kumin hian Mizoram hi Group A-ah Services, Jammu & Kashmir, Railways leh Maharashtra te nen an awm ho a, February 29 hian an match hmasa berah Railways an hmachhawn ang.