Britain team-ah Murray

Davis Cup champion Britain chuan kumina an match hmasa ber atan March 4-6 chhung khian Japan an hmachhawn dawn a, world number 2 Andy Murray chu khaipa a ni ang.

Britain team-ah hian kum 28-a upa Murray bakah hian a unaupa Jamie, Kyle Edmund, Dominic Inglot leh Dan Evans te pawh an tel dawn a ni.

GB coach Leon Smith chuan, "Kan inenchhin dawn a, kan team-ah rinna ka nghat ngam. Kan rama kan khel tur hi kan vannei hle," tiin a sawi.

Britain hian nikum November thla khan Davis Cup final-ah Belgium hnehin champion nomawi an chawi a, kum 1936 hnua a vawi khat nan hlawhtlinna an chang a ni.

Murray hi Britain innghahna a ni leh dawn a, nikum pawh khan Davis Cup-a a match khelh zawng zawngah hnehna a chang vek a ni.

Britain fa chuam hian Wimbledon leh US Open champion nomawi a chawi tawh a, kumina Grand Slam hmasa ber Australian Open-ah khan final lutin Novak Djokovic lakah a chak lo thung.