Kar thum chawl tur Debuchy

Arsenal defender Mathieu Debuchy-a'n Euro 2016 khelh a duh avangin inkhelh tam theih beiseiin January thla khan French Ligue 1 club Bordeaux chu loan-in a zawm a, mahse tihrâwl na vangin kar thum chhung vel a inkhel thei dawn lo.

Kum 30-a upa Debuchy hian Bordeaux leh Nice te inkhelh ṭum-in hliam a tuar a, a hliam hi endik a nih hnuah a lo berah kar hnih aṭanga kar thum tal chawlh a ngaih tur thu Bordeaux chuan an puang a ni.

Newcastle player hlui hian French tan match 27 khel tawhin goal hnih a khung ve tawh a, ram tana inlan thei tura khelh ṭhat a mamawh lai taka a inhliam hi a tan chanchin lawmawm loh a ni ngei ang.