FIFA siamṭha tura hmanhmawh Infantino

February 26-a FIFA president thar thlan-naa chuh tur zinga mi Gianni Infantino chuan FIFA chu tunah siamṭhat a ngai niin a sawi a, tuna siamṭhat a nih loh chuan engtikahmah siamṭhat a nih loh tur thu a sawi.

Hetihlai hian FIFA presidential candidate zinga mi Prince Ali bin al-Hussein chuan FIFA hruaitu thlanna voting system chu a langtlang tawk lo nia sawiin Court of Arbitration for Sport (CAS) hnenah a zualko a, FIFA president thar thlanna chu ruahmanna thar siam a duh thu a thlen a ni.

Mahse, Infantion chuan engkim rua-hmanna anga a kaltluan thu a sawi a, ṭha taka FIFA president thlanna an neih theih a beisei thu a sawi.

FIFA president kalchhuak Sepp Blatter chu kum riat chhung football kaihhnawiha inhnamhnawih thei lo tura hrem a ni a, Blatter thlak tura beisei ber Michel Platini chu kum riat tho hrem a nih bawk avangin Infantino hian rin a hlawh hle.

UEFA general secretary Infantino chuan, "Tun hnai chhung ringawt pawh khan FIFA-a buaina tam tak chu kan hmu a, FIFA nihna diktak hailanin a awm a ni. Engemaw tak chu tih a ngai a, insiamṭhat kan mamawh. FIFA siamṭhat hna hi tuna kan thawh loh chuan naktukah kan thawk lo ang," tiin FIFA siam-
ṭha tura bul ṭan nghal a ngaih thu a sawi.

FIFA president thar hi FIFA hnuaia ram 209 aiawhten Zirtawpni khian FIFA general headquarters awmna Zurich khawpuiah thlanna an nei dawn a ni.