Basketball inelna lian kan nghak chhuak ta

Mizorama Basketball inelna lian leh ngaihlut ber Mizoram Super League season 2 chu zanin dar 8:30 aṭang hian Hawla Indoor Stadium, Republic Vengthlangah khelh ṭan a ni dawn a, champion lai Khatla TBL hmaah Chaltlang Ryders an ding dawn; inkhel hmuhnawm kan hmuh nghal beisei a ni. MSL2 hi Zonet Zawlbuk-ah live a tihchhuah ṭhin a ni ang.

Khatla TBL hian India captain Vishesh Bhriguvanshi leh nikuma champion puitu Pratham Singh te la lut leh mah se anni pahnih hi an la chhawr thei dawn lo a, hetihlai hian zanina an khingpui tur Ryders erawhin state pawn player Rachit leh Vishal Kumar Gupta te an chhawr thei dawn thung. Mahse an coach cum player K Labiakzuala chu ke na vangin an chhawr thei dawn lo thung.

Kalphung thar

MSL1 ang lo deuhin season 2-ah hi chuan semifinal a awm tawh dawn a, team parukte vawi khat ṭheuh an inkhelh kual hnuah a sang paliin semifinal an khel dawn, knockout stage chin hi 'best of three' a khelh tur a ni ang. League stage tawpah pangana leh parukna ten best of three-in 'Relegation Playoff' an khel dawn.

Relegation Playoff-a chak zawk chuan MSL3 khel turin Division I pahnihna VR4 nen 'best of three'-in Playoff an khel leh ang a, a chak lo zawk erawh Division 1-ah an tla thla ang. Semifinal leh playoff khelh a nih dawn avang hian league match tawp ber thlengin a hmuhnawm tluan vek ngei tura rin a ni.

Vawi khat ve ve

Khatla TBL hian season hmasa khan vawi khat chiah chak loh an nei a, Zarkawt Setpents an hneh lo. An champion kalkawngah Ryders hi vawi hnih an hneh nghe nghe. Hetih lai hian Ryders erawh MSL1-ah kha chuan team nem bera ngaih an ni a, vawi khat chiah chak ni hmel an hmu thung a, table mawngphah an ni.

MVP inlan dawn

MSL1 Most Valuable Player H Laldin-sanga chu TBL thahruai a ni leh ngeiin a rinawm, Saron Veng tlangval hian season hmasa khan point 143 score-in a ṭhiante score tur vawi 14 a siamsak bawk. Ryders tan Mapuia dan hi a harsa dawn a, an dang thei a nih erawh chuan chakna kawng a inhawng zau ngei ang.

Tunge Rachit?

Delhi tlangval, power forward Rachit hian India basaketball-ah tawnhriat a nei ṭha tawh a, All Indian Senior Tournament champion team-ah a tel tawh bakah Pacific International Games-ah pawh lo inlan tawh a nih avangin a tawnhriat hi Ryders tan a ṭangkai dawn.

Eng nge an sawi?

Chaltlang Ryders assistant coach Peter Lalrintluanga chuan, "Nikum ang kan ni tawh lo, inbuatsaihna kan nei ṭha a, player-te an fitness a ṭhain an discipline a
ṭha bawk a, inrintawkna sang tak nen TBL kan hmachhawn thei dawn. Chaltlang veng mipui bakah veng hnrang hrang aṭangin
ṭantu kan nei a, anni zarah result ṭha neih nghal kan beisei," tiin Vanglaini palai a hrilh.

Khatla TBL manager Lalawmpuia Pachuau chuan, "Chaltlang Ryders hian hmasawn ngei tumin an inla ṭha tih kan hria a, MSL1-a kan player pawimawh pathum ngawt City Police-ah ṭang tawh mah se an hmunruak luahkhattu tur kan lakluh avangin kan zam lo a, hnehna chan kan beisei," tiin Vanglaini palai a hrilh ve bawk. TBL hian engtik lai mahin fans an nei chhe ngai lo a, zaninah pawh an
ṭhahnem leh ngei ang.