Bayern chelh dingtu Juventus an huaisen

Juventus-in awlsam taka hneh chi an ni lo tih Thawhlehni zan khan an pholang a, UEFA Champions League last 16 inkhelah si hnih an phurh zet hnuin Bayern Munich chu 2-2 in an inhnehtawkpui.

Bundesliga hmahruaitu Bayern-in inkhel an thunun hneh a, Thomas Muller leh Arjen Robben-te hmangin goal hmahruai an khung. Si hnih an phurh hnuah Juventus an harh thar a, Paulo Dybala leh Stefano Sturaro-te hmangin an si phurh an sut a ni.

Team pahnih hi March 16 zanah second leg khel turin Allianz Arena-ah an intawng leh dawn a, khualmuala goal hnih nei sa Ba-yern Munich dinhmun a ṭha zawk.

Talbuai Juve

Juventus-in Bayern an mi-khual hmain kum 2016-ah match 11 an khel a, goal khat chiah an chhuah. Mahse, Serie A-ah Bayern Munich ang team ṭha an la hmachhawn lo a, German champion hmaah fiahin an awm.

Bayern player hlui Arturo Vidal leh Juan Bernat-te'n inkhel ṭan aṭanga rei loteah veteran keeper Gianluigi Buffon tan hna hautak an siamsak nghal a, Muller-a'n a khung teuh hle.

Minute 43-naah Juventus an ṭang khawng zo lo a, Bayern Munich-in goal an khung ta nge nge. Douglas Costa ball cross defender Andrea Barzagli-a'n a lo dan per chu Muller-a ke bulah a tla a, Germany international hian yard 10 vela hla aṭangin a pet goal.

Second half-a goal khung hmasatu pawh Bayern tho an ni. Striker Robert Lewandowski-a'n Robben tana ball a siamsak chu a sir deuh niin lang mah se Dutch winger hian ṭha taka a insiam rem hnuah Juventus goal-ah a khung a, Buffon-a tan dan theih a ni lo.

Juve tak tak

Italian champion-in si hnih an phurh hnuah mualpho taka tlawm an tum lo. Bayern rawlthar defender Joshua Kimmich-a chesual a, Mario Mandzukic chuan mawi takin Dybala tan a siamsak. Argentine striker hian tun season-a a goal 17-na ni turin minute 63-naah a pet goal.

Juventus an phur tawlh tawlh a, minute 76-naah substitute Stefano Sturaro chuan Alvaro Morata ball siamsak chu hnai set sawt aṭangin a pet goal a, team pahnihin goal hnih ve ve khungin an inhnehtawk.

Old Lady (Juventus sawina) manager Massimiliano Allegri-a'n manager ṭha bik a nihzia a tarlang a, si hnih an phurh hnuah Hernanes, Sturaro leh Alvaro Morata-te khelmual chhungah a luhtir a, player pathum luh hnuah Juve khel a danglam a, an tlarhma an hlauhawm phah sawt. Italian champion 'comeback' hi a ropui a, chutihrualin Bayern hian defence laiah player pathum midfielder Joshua Kimmich, wing back David Alaba leh Juan Bernat te an hmang a, inhliam vangin Pep Guardiola-a'n starting eleven-ah natural central defender an dah thei lo tih erawh hriat tel a ṭha.

Eng nge an sawi?

Bayern manager Pep Guardiola chuan, "Juventus hian season hmasa khan Champions League final an khel a, keini chuan kan thleng pha lo. Kan hmachhawn team hi club tenau an nih loh avangin kan khelh danah khan ka lawm a, ka career-a match ka hriatreng tur zinga mi a ni," a ti.

Season thar aṭanga Man-chester City manager tur chuan sawi chhunzawmin, "Kan khingpuiten chance an nei ve thei lo anga ngaih chu ngaihdan atthlak a ni a, hei hi football chu a ni. A chang chuan result ringawt ngaihtuah loa inkhelh dan i ngaihtuah tel a ngai a, kan khel ṭha hle a ni," tiin goal hnih hum zo lo mah se a player-te a sawisel duh lo.

Juve coach Massimiliano Allegri chuan, "First half-ah khan min nawr na em em a, kan dawl zo lo a ni ber e. Tihsual tam tak nei chungin inkhel bul kan ṭan a, pass sual kan ngah bakah hmun awl kan insiam thei lo. Kan hriatreng tur erawh Bayern kan hmachhawn tih hi a ni. Chawlhlawk zawhah kan khel ṭha takzet a, chak thei dinhmunah kan ding hman hial a ni. Munich-a kan kal hunah chuan first half-a kan khelh dan khan kan khel thiang tawh lo ang," tiin Allianz Arena-ah chak ngei a tum.