Japan Open champion Shelton

Tennis inelna Japan Open khelh zawh takah Ben Shelton a champion. American tlangval hian darkar khat leh minute 24 chhungin Aslan Karatsev chu 7-5, 6-1 a hnehin a champion a ni.

Kum 21 mi Shelton hian vawi 18 ngawt winners a vaw chhuak a, a ball vuak nat leh dik chu a chhawr ṭangkai hle. Tun kara ranking chhuak tharah chuan 15-na a ni dawn a, world ranking lama a tawn san ber ṭum a ni nghal ang.

Shelton chuan, "Kei leh kan team tan chuan ATP Tour huanga hlawhtlinna chan hi a hluin a ropui hle, tun hun thleng tur hian hman aṭang tawh khan theihtawp kan lo chhuah tawh ṭhin a ni," tiin a sawi.

Tennis season a zo hnai a, tun season atan chuan Grand Slam inelna pali - Australian Open, French Open, Wimbledon leh US Open te an khel zo tawh, tunlai hian Asia khawmualpuiah inelna tenau zawk hrang hrang an khel mek a ni.

Season hmawr bawkna erawh ATP Finals a ni leh dawn a, ranking sang zual pariat inelna hi Turin khawpuiah November 11-19 chhung hian khelh a ni dawn.