Judgement Day: Services, Mizoram leh Uttarakhand bukin an awm dawn
Hero Senior National Football Championship for Santosh Trophy group stage chu vawiinah khelh zawh a ni dawn ta. Final round-ah team 12 chiah an tel dawn a, hmun ruak pahnih chiah a awl tawh. Services, Mizoram leh Uttarakhand ten beiseina an la nei vek.
Amritsar-ah Sikkim leh DNH&DD ten zing dar 8:30-ah match hmasa ber an khel dawn a, Mizoram leh Pondicherry ten chawhma dar 11:30-ah match hnihna an khel ang. Tlai dar 3:30-ah Services leh Uttarakhand ten match hnuhnung ber an khel dawn a ni.
Damlo leh hrem
Mizoramin hun harsa zualpui an paltlang tawh. Uttarkhand an hneh ṭumin midfielder Zonunmawia chu a khua a sik avangin hotel-ah a hahdam a ngai a, Lalthiangliana (AB-a) pawh khelmual thleng mah se dam chian loh avangin a insiam lo.
Defender pawimawh Lalhmunmawia (Ahmuntea) pawhin warm up ti zo peih lo mah se minute 90 chhung a khel thei ta tho. Ahmuntea'n ngai a awh leh tawhah a ngaih theih a, Zonuna leh AB-a te dinhmun tur a chiang lo. Midfielder Johny Lalremruata erawh Uttarakhand lakah yellow card vawi hnihna a hmuh avangin a inlan thei lo ang.
Hmasawnna a awm
Guru Nanak Dev Univ Sports Complex-a inkhelhna hmun hi phaitualhnim a ni a, college ground a nih avangin stadium puitling khelmual angin a mam tawk lo. Inelna ṭantirh lamah ruah a sur avangin ground a nal a, artificial turf-a inkhel ṭhin Mizoram leh Sikkim ten khelh an harsat zual.
Tunah erawh Amritsar-ah khua a ṭha leh tawh a, khelmual pawh tui an pek avangin a chang hran lo. Mizo player-te pawhin an khel thiam ṭan a, chutihrualin ball a sawh nasat deuh avangin eng team tan pawh duhthusam a ni lo.
Tun hnaia result ṭhat tawk loh avangin Mizoram hi seeded an ni pha lo a, an chungah Uttarakhand an dah bawk avangin nikum semifinalist Services nen match hmasa ber an khelh a ngaih phah. Lalsangzuala Hmar hoten Services hneh loa bul an ṭan avangin pressure an ngah a, hlauhthawnna nen an khelh ṭhin avangin an theihna sang ber a la lang lo.
Tunah erawh a zawnin vawi thum an chak ta a, hnehna an channa inkhelah hian goal an chhuak lo vek bawk. Hei vang hian team chhungah inrintawkna a rawn awm leh ṭan a, Pondicherry lakah game mawi leh ṭha zawk an khelh theih beisei a ni.
Mapuia leh a ṭhiante
Mizoram tan Kelkang striker Lalkhawpuimawia (Mapuia) a hlu a, match li aṭangin goal ruk a khung tawh. Pondicherry lakah goal hnih a khung thei a nih chuan group stage bika goal khung tam ber a ni ang.
Mapuia hian goal a khung bakah a tlan tam a, ama hma a sial lo a, a ṭhiante tan a ṭangkai hle. Tlarhmaa awm player dangten goal khung an harsat avangin Mapuia'n pressure a ngah phah a, Uttarakhand lakah Chanmari FC tana a khelhpui Laltlanzova'n goal a khung ta bawk.
Zozoa hi Mapuia chunga pressure awm la kiang thei tur a ni a, match hnuhnung ber a nih tawh avangin Chawnpui FC inngahna Vanlalthanga leh Chhinga Veng forward Lallawmsanga leh PC Lallawmkima te pawh an inlar a hun ta hle.
Game ṭha zawk
Mizoram team-in talent nei ṭha bik R. Malsawmtluanga an kawl a, Msa hian theihna sang tak a neih avanga koh a ni. MPL10 bikah erawh phase 1 bika minute 630 khelh theih aṭanga minute 103 chauh khel a ni.
Coach Lalsangzuala Hmar-in Msa theihna a hrechiang a, mahse damlohna avangin match hnih a awl a ṭul leh a, duhthusam fitness a la nei lo. Pondicherry lakah Msa ṭha zawk a inlar theih a rinawm a, ani hi a khelh ṭhat phawt chuan tlarhma lamin chance an ngah phah ang.
Msa thlawp tur hian H. Lalbiak-thanga leh Crespo Vanlalhriatpuia te an awm a rinawm. Tlarhnung lam an inrem dik tawh a, coach Sanga'n a khawih che lo a nih pawhin a mak lo ang.
Services inngahna Thangpuia
Mizoram hian Services an hneh lo a, an hneh loh Servies lakah hian an innghahna chin a awm. Services tan MPL best defender vawi hnih ni tawh Zothanpuia (Thangpuia) a pawimawh hle.
Thangpuia bakah hian goalkeeper PC Roluahpuia a awm bawk a, ani erawh DNH&DD an hneh ṭumah chauh a la inlan. Mizo player pahnih hian Mizoram team an khelh apiangin an ṭawiawm zel.
Chutihrualin Services hian tlak theih dan an la nei ve tho a, chuvangin anni tan Uttarakhand hneh hi a pawimawh hle.