Zaninah Champions League Man United leh Arsenal inlan dawn
European football inelna sang ber Champions League chu zanin hian group stage khelh chhunzawm a ni dawn. Premier League team lian Manchester United leh Arsenal te zan dar 12:30-ah an inlan ve ve ang.
English team pahnih tan last 16 lut turin chak a pawimawh, a bik takin match vawi hnih an khelh tawha point la hmu lo Manchester United tan tlawm a thiang tawh lo - Copenhagen lak aṭanga point thum hlawhchhuah ngei an tum dawn.
Rasmus unau pathum
Zanin Old Trafford-a inkhel tur hian chanchin mak danglam tak a nei. Manchester United striker Rasmus Hojlund leh a unaute pahnih chu inhmachhawn thei dinhmunah an ding - an pathumin UCL match khatah an inlan rual vek thei dawn tihna a ni.
A upa ber Rasmus hi kum 2003 February thla khan a piang, a naute pahnih Oscar leh Emil te hi phir (twin) niin kum 2005 January thla khan an piang thung, tunah hian Copenhagen tan an khel mek, an unaupa club an hmachhawn dawn.
Midfielder Oscar zawk hi chuan Champions League match pawh a khel tawh a, zaninah pawh inlan ngei tura ngaih a ni. Ramus ang maia tharum ngah Emil-a erawh UCL-ah a la inlan ngai lo, remchang hmasa a zawn a la ngai - atan zanin hi a hmasa ber a ni ngei dawn em, tih a la hriat loh.
Chak mamawh
Erik ten Hag-a naute hian an match hmasa pahnihah Bayern Munich leh Galatasaray te an ngam lo. Group pakhat aṭangin a sang pahnih chauhin last 16 an lut dawn, zanina an chesual leh a nih chuan knockout stage beiseina a tlem tawh khawp ang.
Dutch manager hian tlarhnunga khel turah buaina a nei ṭhin. Kar tawpa an league match-ah Harry Maguire chuan bul a ṭan a, a khel chhe lo. England international hi Copenhagen hmachawn tur pawhin a thlan nawn ngei a rinawm.
Hrem vangin Casemiro a inlan thei dawn lo a, ani a awm loh chuan Scott McTominay a pawimawh leh dawn - Sofyan Amrabat leh Christian Eriksen te an la nei bawk a, captain Bruno Fernandes hoin an buai lo tura ngaih a ni.
Rice a inpeih
Arsenal midfielder Declan Rice chuan Chelsea nen an inhnehtawk hnuah inkhel hautak an hmachhawn tur thu a sawi zui a, zanina Sevilla nen an inkhelh turah hian thawhhona ṭha lehzual an mamawh thu a sawi bakah fans puihna a ngen bawk.
Mikel Arteta enkawl Gunners hi an UCL match hnuhnung berah an tlawm, an zinchhuahna Lens mualah chak tura rinkai ni mah se an chak lo. Ligue 1 club an ngam loh avangin an zinkawng a hautak phah thei a, chuvangin Spanish club lak aṭanga point thum hmuh a pawimawh.
Manager Arteta-a'n si ban nghak turin tunge a rin dawn tih chu zawhna a ni leh. Blues lakah David Raya a che ṭha tawk lo, season hmasa lama a rinrawl Aaron Ramsdale chuan Sevilla lakah inkhel bul a ṭan a nih pawhin a mak hran lo ang.