Hliam vangin Bayern an buai

German champion Bayern Munich damdawi in a lun chhunzawm zel a, Mainz laka 3-1 a an chak ṭuma inhliam midfielder Leon Goretzka chu hun engemaw chen chhung a inlan thei dawn lo.

Goretzka hian Mainz laka an goal thumna a khung rualin a kutah hliam a tuar a, a hliam hi endik niin, Bayern chuan, "Player hliam hi hlawhtling taka zai a ni," an ti a, a chawlh chen tur erawh an sawi lo.

Kum 28 mi Goretzka hian zanin dar 10:15-a Champions League match khel tura Galatasaray an lenchilh hunah club jersey a ha thei dawn lo chiang tihna a ni a, German club hian hliam an kawl sa nual bawk.

Germany international bakah hian Serge Gnabry, Noussair Mazraoui, Raphael Guerreiro leh Dayot Upamecano te chu Bayern hian hliam vangin an chhawr thei lo mek a, an keeper chhuanvawr Manuel Neuer phei chu November 2022 aṭang khan an chhawr leh tawh lo.

Bayern hian an hliam ngah hi chuti tak erawhin an buai phah lo. Bundesliga match riat an khelh tawhah tlawm an la nei lo a, vawi ruk chakin, vawi hnih an khingpui an inhnehtawkpui thung.

Champions League-a match hnih an khelh tawhah pawh Manchester United (4-3) leh FC Copenhagen (2-1) te hneh tawhin an la chak vek a, match hnih khelha point li nei mek Galatasaray hian hneh an lo tum dawn.

Turkish club Galatasaray pawh hian season an hmang ṭha hle. League match kua an khelh tawhah vawi riat chakin, vawi khat draw an nei a, CL match hnihah Copenhagen (2-2) leh Manchester United (2-3) hmachhawnin an la tlawm lo bawk.

Galatasaray hian centre back Davinson Sanchez, winger ṭha Wilfried Zaha, Chelsea aṭanga loan-a an hawh Hakim Ziyech, Arsenal midfielder hlui Lucas Torreira, Tottenham Hotspur tana khel ṭhin Tanguy Ndombele, Argentine striker ṭha Mauro Icardi leh Napoli forward hlui Dries Mertens te ho an kawl a, United hneh hlim team hian Bayern lakah chak an tum ngam ang.