Modric a chhuak dawn lo

Real Madrid CEO Jose Angel Sanchez chuan January-a Saudi Arabia lam pan tur anga sawi Luka Modric chu a chhuah loh tur thu a sawi a, engmah indawrna kalpui a la awm loh thu a sawi chhuak.

Sanchez chuan, "Saudi league nena sawizawm a nih chungchangah hian official taka indawrna engmah a la awm lo a, ama lam aṭangin January-a chhuah duhna thu engmah kan la dawng lo bawk," a ti.

Kum 38 mi Modric hian June thla khan Real-a kum khat dang cham turin contract thar a ziak a, mahse, Jude Bellingham awm hnuah Croatian legend hian a duh angin khelhna hmun a chang tam tawk tawh lo.

Tun season inelna hrang hrangah Modric hian Real tan match 10 a khel tawh a, mahse, heng zinga match liah chiah hian bul ṭanin, match rukah bench aṭanga luhtir a ni a, minute 90 khelh tluan a la nei miah lo - khelmuala a hun hman tawh zat hi minute 414 chiah a ni.

Modric hian, "Khelmuala inlan ka duh. Ni thum dana la inkhelh ve ziah ka duh a, ka taksa pawh a la inpeih reng a ni," tiin a lo sawi tawh a, thil thleng a hriatthiam thu erawh a sawi tel tho.

Heti chung hian Saudi nen sawizawm a ni zui a, Lionel Messi khelhna Inter Miami nen sawizawm a ni bawk - January-ah a chhuak lo a nih pawhin a contract hman zawhah chuan a kum a tam ve tawh bawk nen a pawhsei a beiseiawm lo.

Real Madrid hian zanin dar 12:30-ah SC Braga nen Champions League match an khel dawn. Match hnih khelha vawi hnih chak tawh Real hi chak tura beisei an ni a, Inrinniah El Clasico an khelh dawn avangin Carlo Ancelotti-a'n a player neih ṭhat ṭhenkhat a chawlh hahdamtir a rinawm.

Madrid khaw club awmna group C inkhel dangah zanin dar 12:30 hian Napoli an inlan dawn bawk a, match hnih khelh tawha la tlawm ve ve Union Berlin an lenchilh ang.