Papu Gomez-a'n hrem a nihna a pha

World Cup 2022 champion Argentina team zinga mi Papu Gomez chuan damdawi hman phal loh hmanga puh a nihna chu a pha a, kum hnih chhung inkhel thei lo tura hrem midfielder hi social media lamah a insawifiah.

Kar hmasa Zirtawpni khan Gomez hi FIFA chuan kum hnih atan an hrem a, October 2022-a Sevilla tana a khelh lai khan damdawi hman phal loh a lo hmang reng niin an sawi.

Mahse, kum 35 mi midfielder chuan, "Terbutaline damdawi hi damlohna vang a nih chuan infiammiten kan hman hi phalsak kan ni a, he damdawi hian engti kawng mahin kan khelh danah nghawng a nei phak lo," a ti.

Gomez chuan a buaina chungchang chu dan ang taka kalpui a ni lo, a ti a, hei vang hian dan anga khin let a tum thu a sawi bawk - a damdawi ei chu a fapa awm na damdawi, hre loa a lo ei palh a nih thu a sawi tel.

World Cup 2022-a Argentina tana vawi hnih inlan ve Gomez hi kum 35 a nih tawh avangin kum hnih an hremna hi tuar ta se, player a nihna anga a football career chu a mangṭha a ṭul hial mai thei.

September thla tawp khan Serie A club Monza a zawm a, match hnih chiah a la khelhsak hman tihin hrem a ni zui - an ram club Arsenal de Sarandí aṭanga a career ṭanin, San Lorenzo tan a khel leh a, kum 2010 khan Serie A club Catania a zawm.

Season thum hnuah Ukrainian Premier League club Metalist Kharkiv a zawm a, kum 2014 khan Serie A club Atalanta-ah a pem. Italian club-ah hian a hming chherin, inelna hrang hranga match 252 a khelhsakah goal 59 a khung.

Serie A 2019-20 season-ah khan team of the year-ah langin, best midfielder-ah thlan a ni bawk a, season hnih chu assist ngah ber a ni bawk. Kum 2020-ah Sevilla a pan a, season thum a khel a, Europa League nomawi vawi khat a chawipui.

Gomez-a'n damdawi hman phal loh a hmang an tih Terbutaline hi asthma, bronchitis, emphysema leh chuap lam ṭha lo damdawi atan hman a ni.