Silly Point: HNEH THEIH LOH NUN

Team India chuan champion tura rinkai ber an nihna chu a taka tilang zelin, tun Pathianni khan , Dharamshala-ah wicket 4-in New Zealand an han hneh leh a.Ram 10 inelna, Round 9 khelh tura round 5 zoin, pole position lain, Rohit Sharma leh a hote hi tun World Cup a, hneh loh la tawng lo awmchhun an ni hrih a. He Honeymoon period an hman mek hi, November 19 thleng daih thei tak maw?

Semi Final rimnam

Thil a kal khaw lo bawihte a nih loh chuan, Rohit Sharma leh a hote hian semifinal an invawkai tawh angah kan dah thei ang a. Tun World Cup a ṭum khat inlanna Md Shami-a'n wicket 5 ngawt an la thei kha, inkhel lo awm leh zel tura team management lam luhaina ṭha zawk pe tu a ni dawn a. India Starting line up tur hi an khelh chhiat hlawm em vang ni loa, an ṭhat êm avanga an inthlak danglam deuh chhen a nih pawn, a lawmawm lamah ngai zel ang.

Chawlhna Tuikam

India team inlan leh hmasak ber chu tun Pathianniah, Lucknow lama champion lai England nen an intum hun a ni dawn a. Team member zawng zawngte chawl hahdam turin mahni khua lam an pan sang sang a, October 26 , Ningani tlaiah erawh an thlenna tur Taj Mahal Hotel, Lucknow-ah in report kim leh vek turin Rahul Dravid-a'n a naute chawlh a pe hrih a ni. Indian team hi World Cup ṭan hma aṭang tawh khan inkhelin an la chawl mang lova, hetiang ang anmahni battery han in recharge hun ṭha an nei hi a pawimawh khawp ang.

Midang

South Africa lam hi Netherlands lakah zahthlak taka an tawlhthuk hnuah, semi ticket an book dawn a nih chuan vawiin tlai Bangladesh leh Zirtawp zan Pakistan laka hnehna hlado an chham a ngai ang a. Palian muthlu Australia hian naktuk zana Netherlands an tum hnuah, Inrinnia an ṭhenawm New Zealand nena an inkhelh result hian thui takin an awm zel dan tur a hril bawk ngei ang.