Barca chakpuitu hriat ngai loh Guiu

Spanish champion Barcelona chuan Pathianni zan khan Athletic Bilbao lakah 1-0 in hnehna an chang a, Catalan club tana goal khungtu hi i hriat ngai loh Marc Guiu a ni.

Kum 17 mi forward hi Barca lakah hian minute 79-naah luhtir a ni a, second 33 chiah khelmualah hun a hmang hman tihin chakna goal a khung nghal - Barca chanchina club tana league goal khung rang ber record a siam nghal.

Barca-in hnehna an chan avangin table-ah pathumna dinhmun an luah chhunzawm a, khelh zat inangah hmahruaitu Real Madrid chu point khat chiahin an phak lo - pahnihna Girona pawhin Real ang thoin point 25 an nei.

A harsa

Barca-in mikhual lakah goal khung an harsat - Joao Felix chuan crossbar a tihper bakah keeper Unai Simon chuan a chance neih dang a dansak a, Fermin Lopez hun ṭha neih pawh Spain international keeper hian engmah lo maiah a chantir.

Kum 16 mi winger Lamine Yamal-a'n a chance neih a chhawr bik lo a, team pahnih hi point insemin an ṭin mai dawn niin a lang hman. Bilbao tan Nico Williams chuan chance nei ve bawk mah se a chhawr bik lo.

A tawpa goal khungtu erawh rin loh lam aṭangin a ni a, La Masia chhuak Guiu chuan senior team tana khelh a phu a ni, tih pholangin minute 80-naah goal a khung a, fans thawm chu ring tak a ni.

Mamawh chhanna

Barca-in hliam vangin player chhawr theih loh an nei nual a, chhawr theih loh zingah Robert Lewandowski leh Frenkie de Jong chu player langsar an ni - hei vang hian Xavi-a'n academy lam a hawi tel lo thei lo a, thlan zingah Guiu a tel.

Guiu hian senior team chu sawi loh, B team tan pawh minute sarih chiah a la khel a, Barca Under-18 lamah a hun tam zawk a la hmang. Mahse, Pathianni zanah rin loh takin a khel a, goal a khung zui.

Lawm avanga Guiu nu leh pa mittui tla kha khawvelin a hmuh hmaih lo. Barca hian Guiu bakah Gavi, Alejandro Bale, Lopez leh Yamal te ho an nei a, La Masia-in footballer ṭha zawk min chhawpchhuahsak zel dawn niin a lang.