AC Milan mualah Juventus an chak

Pathianni zan Serie A inkhel hmuhnawmah Juventus chuan AC Milan 1-0 in an hneh. Malick Thiaw-a hnawhchhuah a nih avangin Milan hian minute 50 chhung chu player kim loa an khelh a ngai a ni.

San Siro-a inkhelah Milan goalkeeper pahnih Mike Maignan leh Marco Sportiello te chu hliam leh hrem vangin an inlan thei lo a, third choice goalkeeper Antonio Mirante chuan si ban a nghak.

A tir lamah Olivier Giroud chuan goal a khung teuh hle, amah vengtu defender a vir khum hnuah ṭha takin pet mah se goal ban hrulah a kal liam. Chawlhlawk hmain Thiaw-a'n a ven tur Moise Kean a veng hneh lo a, a tihtluk zui avangin red card a hmu.

Player tam zawk an nih hnuah pawh Juventus an chungnung hleithei lo. Minute 63-naah Manuel Locatelli chuan hla deuh tak aṭangin a shot a, defender Rade Krunic chuan lo dang pialin keeper Mirante tan dan theih a ni tawh lo.

Goal awmchhun khungtu Locatelli chuan, "Inkhelh ṭan hma aṭang khan goal khung beiseina ka nei tawh. Tun hma pawhin hetiang hlimna hi ka lo tawng tawh a ni," tiin a sawi. Kum 18 mi chauh a nih laiin Locatelli hian Juve tan Milan laka chakna goal awmchhun a lo khung tawh.

Old Lady hian tun season Serie A match vawi kua an khelh tawhah vawi khat chiah tlawm an la nei, point 20 hmuin table-ah pathumna an ni mek, hmahruaitu Inter Milan an phak lohna chu point hnih chauh a ni.

AC Milan manager Stefano Pioli chuan, "Kan duh ang result chu a ni lo. Mahse, player 11 kan nih laiin kan khel ṭha a, player 10 kan nih hnuah pawh kan khel ṭha lo. A tlem zawk ni chung pawhin Juventus kha kan hlau miah lo, kan rilru a huaisen a ni,"

a ti.