Chak loh nei lo India

Cricket World Cup 2023-ah India chuan ro an rel mek - Pathianni khan New Zealand chu wicket liin an hneh a, CWC khelh meka chak vek awmchhun an ni ta.

Dharamshala-a inkhelah India-in vawm hmasak an thlang a, Black Caps an bat hmasa - Devon Conway chu run siam loin out nghal mah se, Daryl Mitchell chuan run 130 zet vaw chhuakin New Zealand tan beiseina a siamsak a, over 50-ah out vekin run 273 an tlin.

New Zealand tan run 75 siamtu Rachin Ravindra pawh a che pangngai viau a, Indian bowler zingah wicket nga zet latu Mohammed Shami a che ṭha takzet.

India bat hun a thleng a, chhandamtu chu Virat Kohli bawk a ni - 'King Kohli' hming lem an pek hian run 95 zet a vaw chhuak a, Rohit Sharma (46) leh run 39 siama a tawp thleng dam Ravindra Jadeja ten an thawk ṭha thawkhat viau bawk.

India hian over 48-ah target an um phak fel der a, wicket sarih chiah an hloh - match nga khelh tawhah an la chak vek a, semifinal rim an hre ṭan tawh.