US lamah pawh Verstappen tho a chak

Formula 1 world champion Max Verstappen chuan chawlh zai reng a rel lo. Pathianni zana tlan zawh tak US Grand Prix-ah pawh Red Bull driver bawk hi a chak a, tun season chhungin ṭum 15 ngawt hnehna a chang tling ta a ni.

Verstappen a chak lai hian Lewis Hamilton leh Charles Leclerc te tan erawh hun duhawm lo a ni thung. Hamilton hian Max a phak lohna chu second hnih chauh a ni, mahse a car hmanah dan phal loh thil a awm avangin result nei loa dah (disqualify) a ni, ani ang bawkin Leclerc pawh a ni bawk.

Mercedes driver Hamilton-a'n result a neih loh takah chuan, pahnihnaah McLaren driver Lando Norris awmin pathumna chu Ferrari car khalhtu Carlos Sainz a ni thung a ni.

Dutch tlangval Verstappen chuan, "A nihna takah chuan intlansiak tak kan neih hmain car brake kan thlak a, inrintawk a harsa khawp mai. Team dang kha an tlan ṭha khawp mai a, chumi karah parukna aṭanga a hmasa bera ka thleng thei kha ka tan chuan thil chhianchhiah tlak tak a ni," a ti.

F1 team leh driver champion a chiang tawh a, inelna erawh ruahman lawk anga kalpui zel a la ni. October 29, Pathianni zanah Mexican Grand Prix an tlan leh ang.