Kum nga hnuah Mizoramin Santosh Trophy final round khel dawn

77th National Football Championship for Santosh Trophy-ah nimin khan Mizoramin group match hnuhnung berah Pondicherry 6-0 in an sawp a, inkhel result dang nghah ngai tawh loin final round an lut. Kum 2018 hnuah a vawi khat nan Mizoramin final round an khel ang.

GGNU Sports Complex, Amritsar-a inkhelah Mizoramin first half-ah Lalkhawpuimawia (Mapuia) hmangin goal khat an khung. Second half-ah substitute PC Lallawmkima'n hattrick a siam bakah Mapuia'n a khung belh a, Laltlanzova'n goal rukna leh final round luh nemnghehna goal a khung.

Nimin inkhel hnuhnung berah Services-in Uttarakhand 4-1 in an hneh a, final round atana inpettling hnuhnung ber ni mah se group E pakhatna an ni.

Khelh dan ngai

Coach Lalsangzuala Hmarin Services leh Uttarakhand an hmachhawn ṭuma an khelh dan bawkin player a rawn rem. Uttarakhand an hneh ṭum aṭangin player pakhat an thlak a, Johny Lalremruata chu hrem a nih avangin a aiah Sialhawk tlangval Crespo Vanlalhriatpuia a lut.

Group E inkhel hmasa berah Sikkim-in DNH&DD 2-1 in an hneh a, hei vang hian Mizoram tan final round luh beiseina nei turin 2-0 a chak ngei a ngai. Inkhel dang result nghah ngai lo a, tling turin 6-0 a chak a ṭul thung.

Vanduaina chu

Mizoramin bul an ṭan ṭha a, R. Malsawmtluanga'n crossbar a pet per nghal. Zozoa'n keeper chiah a hmachhawn hnuah a khung lo. Crespo cross ball ṭha zet pawh Mapuia'n goal-ah pet mah se keeper Kishore-a'n a dang hman.

Defender Lalhmunmawia'n midfielder H. Lalbiakthanga freekick a tauh lut lo a, minute 16-naah Mizoramin an phu angin an ti goal. Crespo-a'n ṭha zeta a khalh luh hnuah a cross ball tawih zet chu Mapuia'n a tauh goal.

Mizoramin goal an khung zut zut tura ngaih ni mah se goal hmaah an vanduai chhunzawm. Mapuia'n chance ṭha dang a hlah bakah Zozoa'n keeper chauh a hmachhawn hnuah a khung lo. Offside vangin Mapuia khung pawm a ni lo a, first half-ah Mizoramin 1-0 in hma hruai tho mah se an vanduai - goal tam zawk khung thei tur an ni.

Samthang tlangval PC-a

Mizoramin second half thunun leh tho mah se first half angin chance ṭha bik an ngah ta lo. Chutihrualin goal khung theihna tur hun ṭha an nei tho a, keeper dan loh ṭumah goal line aṭangin defender-ten an dang.

Vanneihna beiseiin Mizoramin bench aṭangin Army Green captain hlui PC-a an luhtir a, Samthang tlangval hi Mizoram hmun hima dahtu a ni. Minute 72-naah PC-a'n khalh lutin a ball pet chu keeper-in dang mah se Zozoa'n a pet lehnghal a, keeper-in dang nawn lehin hemi per hi PC-a'n a khung.

Minute 77-naah Rinzuala cross ṭha chu PC-a bawkin a tauh goal a, Samthang tlangval PC-a hian minute 83-naah Mapuia siamsak chu a khung leh bawk. PC-a hian minute 11 chhungin hattrick a siam.

Minute 86-naah bench aṭanga lut Ephraim Lalremtluanga cross chu a luhpui Suanngaihmuana'n tauh letin Mapuia'n a tauh goal. Mizoram an phur zel a, PC-a goal khung pawmsak ni tawh lo mah se injury time-ah Zozoa'n mawi zetin a tauh lut. Sanga kaihhruai Mizoramin final round lut tura an goal mamawh, goal ruk khungin hnehna an chang.

Pathian malsawmna

Mizoram hian match hmasa berah Services an hmachhawn a, 2-1 in an hneh lo nghal. Hei vang hian team chhungah pressure a sang a, hlauhthawnna a lian hle. Hetiang karah hian Mizoram team hian final round besei tlatin discipline ṭha tak hnuaiah an awm a, an insum theihnain rah ṭha a thlen.

Mizoram hian DNH&DD chu 5-0 in an hneh a, goal hnuhnung pathum hi minute 80 hnu lama lut a ni. Sikkim leh Uttarakhand lakah bul an ṭan ṭha tawk lo a, a tawpah 1-0 in an chak ve ve. Pondicherry lakah pawh Mizoramin goal khung an harsat a, minute nga hun pek belhah minute nganaah goal khungin final round lut turin an tling.

Mizoram team hian zan tinin devotion an hmang a, inkhelh hma apiangin ṭawngṭairualna an nei a, hlawhtlinna an chan zawhah an ṭawngṭairual leh bawk. Chutihrualin inelna hi a inṭan dawn chauh a, Mizoram hi team 12 zingah an tel tihna chauh a ni.

Kum 2019 khan Mizoram hi kum 2020 atan final round khel turin tling mah se Covid-19 vangin inelna neih theih a ni lo. Hri leng reh hnuah Mizoramin ṭum hnih final round an tling zo lo a, kuminah erawh coach Lalsangzuala Hmar hoin an inpettling.