Newcastle khelmualah hlauh nei lo Dortmund

Tun season Champions League-a group stage ngaihnawm bera chhal ngam chu group F hi a ni - a chhan maw? Newcastle United, Paris St-Germain, AC Milan leh Borussia Dortmund te awmna an ni tlat.

Match hnih ṭheuh khelh tawhah team pali hi an la intlansan thui lo hlawm hle. Zanin dar 12:30 hian hmahruaitu Newcastle chuan Dortmund an mikhual dawn a, German club hian hnehna an chan chuan Magpies nen an point hmuh zat a inang thei zui ang.

Zanin dar 12:30 veka group F inkhel dangah PSG chuan AC Milan an mikhual dawn bawk a, inkhel tur hi en châkawm tia chhal ngam ve ve a ni - football fan-te u puannuam la ula, lukham nen inkhel en turin inpeih ru le!

Goal khung thiam

Season hman zawh takah khan Newcastle United chuan rin loh takin top four-ah season an khar a, rinhlelhna nen season tharah mipuiin kan thlir - an match hmasa berah Aston Villa chu 5-1 ngawtin sawp mah se, league match thum a zawnin an chak lo zui!

Mi tam takin season hmasaa an chet ṭhat chu tihpalh thilah an puhsak a, hei hian Eddie Howe-a leh a naute ngeng a chhun. A hnu league match ngaah an tlawm tawh lo a, goal 17 zet khungin an lamah goal hnih chiah a lut.

Champions League-ah lah AC Milan chu 0-0 in inhnehtawkpui mah se, an match hnihnaah 4-1 ngawtin PSG an sawp a, French club hi an neih ṭhat ber ber Kylian Mbappe, Gonçalo Ramos, Randal Kolo Muani, Lucas Hernandez, Marquinhos, Achraf Hakimi leh Gianluigi Donnarumma te ho nena inlan an nih avangin khawvelin Newcastle a ringhlel leh tawh lo.

Mahse...

Magpies an phur a, an phur ang thoa phur Dortmund an mikhual tur hi inkhel en tichâkawmtu a ni. German club hian CL match hnihah point khat chiah la nei mah se Bundesliga lama match riat an khelh tawhah tlawm an la nei lo.

Match ruk chak neiin, vawi hnih an draw a, zaninah inrintawkna nen Magpies mualah an leng dawn. Dutch winger Donyell Malen, Germany international Julian Brandt, German striker Niclas Füllkrug leh tawnhriat nei ṭha Marco Reus te ho ven dan Newcastle-in an ngaihven a ṭul ang.

Magpies hian Joelinton, Miguel Almiron, Bruno Guimaraes leh Alexander Isak te ho an nei ve tho tih hriat a ṭha a, PSG hneh thei an nih miau avangin English club hi German club laka hnehna chang turin an ṭha tawk.