Al Hilal-in Mumbai an sawp

AFC Champions League inkhelah Al Hilal chuan 6-0 ngawtin Mumbai City an sawp a, Indian Super League club hian match thum an khelh tawhah point an la hmuh loh avangin beisei la bo lo mah se last 16 lut tur chuan thilmak an beisei tel a ṭul tawh ang.

Saudi Pro League club Al Hilal-in an mualah inkhel an thunun a, Fulham striker hlui Aleksandar Mitrovic chuan hattrick siamin, Lazio midfielder hlui Sergej Milinkovic-Savic, Mohammed Al-Burayk leh Abdulelah Al-Malki ten goal khat ṭheuh an khung bawk.

ISL club tan season hmasa lawka European football-a player langsar ni phak kawl nualtu Al Hilal an u lutuk hret a, first half-ah 1-0 chauh ni mah se, second half a nih meuh chuan Indian club tan a harsa lutuk tawh.

Mumbai City tan Lalengmawia Ralte (Apuia) a hmuhnawm a, Vaivakawn rawlthar hi midfield-ah Savic leh Wolverhampton Wanderers captain hlui Ruben Neves te nen an inel a, Mumbai mualpho mah se Apuia erawh a mualpho ve lo.

Apuia hian minute 29-naah goal khungna remchang nei mah se Al Hilal goalkeeper Mohammed Al Owais chuan ṭha zetin a dansak a, Indian midfielder ṭhangduang hmingchherna tur chu engmah lo maiah a chantir.

NorthEast United aṭanga hming chher Apuia bakah hian Lallianzuala Chhangte chuan Mumbai tan inkhel bul a ṭan ve bawk a, mahse, hliam vanga Neymar an chhawr thei lo chungin Mumbai tan Al Hilal an ṭha lutuk hret.