National Games 2023: Mizoram team an feh chhuak

India ram pum huap inelna 2023 National Games chu vawiin aṭang hian Goa-ah neih a ni dawn, inelna hmachhawn tur hian nimin khan Mizoram team chuan Aizawl an chhuahsan.

Mizoram contingent hi mi 47 an ni dawn a, inelna neih hun tur erawh a inang lo. Nimin bikah hian a hawnna huna tel tur Mizoram Olympic Association (MOA) hruaitute leh, inelna hmachhawn hmasa tur swimming leh snooker aiawhte an kal hmasa a ni.

An inpeih

MOA bul tumin Mizoram aiawh turte hian hun rei tawh tak aṭang khan inbuatsaihna an kalpui a, tun thlatir khan MSSC Conference Hall, Republic Vengthlangah zin chhuakturte hi ko khawmin, hriat tur hrang hrang an lo hrilh tawh.

Mizoram hi infiamna peng hrang 10-ah an inlan dawn a, infiammi 26 tlingin - boxing (3), judo (1), sepaktakraw (5), shooting (5), swimming (1), taekwondo (7), weightlifting (1), wrestling (1) leh Wushu (1) te an ni a, team official 13 an tel bawk a ni.

Mizo infiammite hian anmahni inlanna tur ṭheuhah theihtawp an chhuah a, zing leh tlai mai bakah zan lam thlengin ṭhenkhat chuan inbuatsaihna an kalpui a, inbuatsaihna a ṭhat avangin medal pawh hlawhchhuah theih ngei an inring.

Beiseina

Mizoram deputy chef de Mission Joseph Thansanga chuan, "Team inelna lamah kan tling ta chiah lo a, chutihrualin kuminah hian inelna kan hmachhawn tur hrang hrang erawh a tam zawk, chuvangin medal pawh tam zawk kan lak theih kan beisei," tiin Vanglaini a hrilh.

Nikum khan Gujarat-ah National Games hi neih a ni a, Mizoram hi football, boxing, judo, weightlifting, swimming leh wushu huangah te inlanin gold medal leh silver pakhat ve ve bakah bronze medal pahnih an la.

National Games 2023 hi November 9 thleng neih tur a ni dawn. India ram chhunga state hrang hrang 28 leh union territories pariat te an inel ang. Inelna pui ber chu GMC Athletic Stadium, Bambolim-ah neih a ni ang.