EPL hmahruaitu Tottenham

Premier League match vawi kua ṭheuh an khel tling ta a, hmahruaitu chu Tottenham Hotspur an ni. A chung bera Spurs awm thu hi mi tam tak chuan mak an ti ngeiin a rinawm, coach Ange Postecoglou hnathawhin fak a phu.

Thawhṭanni zan EPL inkhelah Tottenham hian an mikhual Fulham 2-0 in an hneh. North London club tan hian Son Heung-min leh James Maddison te chuan goal khat ve ve an khung a, mikhual team lamin a chhanletna tur an nei lo.

Postecoglou-a naute hian point 23 an hmu ta a, tun season league match bikah tlawm an la nei lo! An hnuaiah hian champion lai Manchester City leh anmahni ang bawka la tlawm lo Arsenal te an awm - an lakah point hnihin hma an hruai.

Spurs an chak

Tottenham hian nipui bazar lai khan an striker leh club tana goal khung tam ber ni bawk Harry Kane an chân - England captain hian champion duhin Bayern Munich a zawm san, ani tel lo chuan an buai tura rinna a lian hle.

Mahse, coach thar Postecoglou-a'n midfielder thar James Maddison a hmang thiam a, an neihsa Son-a nen an inkawp rem takzet - tun season EPL khelh laiah chuan hmatawng inkawp fuh berte zinga mi an ni, anni aia hlauhawm an awm bik lo ang.

Spurs captain Son-a'n minute 36-naah goal hmahruai a khung. Calvin Bassey-a ball pass chu Micky van de Ven-a'n lo dang chatin, ball kal zel hi South Korea international hian kum mawi takin a khung a, a team hma a hruaipui.

Second half tir lamah Maddison kan hmu ve thung. Bassey-a ball pek sual bawk chu a bul ṭanna niin, goal khung tura siamsaktu erawh Son-a a ni thung. Fulham tan Joao Palhinha chuan tauh goal teuh ve viau mah se keeper Guglielmo Vicario a paltlang thei lo.

Son leh Maddison

Premier League season hman laiah Tottenham captain Son-a'n goal sarih khungin assist vawi khat a nei ta a, a kawppui Maddison chuan goal thum khungin a ṭhiante khung tur vawi nga a siamsak tawh thung - dan theih loh ang mai an ni.

English midfielder Maddison chuan, "Sonny hi chu ka player duh leh ngainat zawng tak a ni a, team khata kan khelh dun hma aṭang khan ka ngaina daih tawh. World class player a ni a, kan inpawh ṭhain training-na hmuna kan zir angin kan che chhuak ṭhin," tiin a player pui a dahsang hle.

Tottenham hian hmatawng player an nei ṭha ṭhin a, mahse an manager hlui Jose Mourinho leh Antonio Conte te khan goal khung aiin a venhim lam an ngaipawimawh hmasa ṭhin, tunah erawh Postecoglou-a'n a khelhtir dan a danglam ta.

Stadium chhunga inkhel entuten manager thar Postecoglou an fak a, a hmuna entu chauh ni loin khawvel hmun hrang hranga Spurs ṭantute pawh an lawm, eng chen nge an thlen theih dawn chu hriat la ni lo mah se attacking football chu hmuhnawm an ti tih a chiang.

Postecoglou thukhawchang

Beisei phak baka ṭhain Premier League season bul an ṭan a, hmahruaitu hial an ni thei. Mahse, Ange Postecoglou chuan kawng hrang hrangin hmasawn an la ngai tih a sawi a, goal hnih faia an chakna inkhelah pawh duhthusam lo lai a awm tih a sawi.

Postecoglou chuan, "Second half kan khelh dan kha chu a ṭha tawk lo, ball chang tam chung sia tihsual kan ngah leh goal kan khung hleithei lo kha a mak, ka awm ve chinah chuan minute 45 kan khelh ṭhat loh ṭum tak a ni hialin ka ring.

"Chutihrualin a tir lama kan khelh dan erawh a ṭha takzet thung, player zawng zawng an ṭangkaiin an hna an tlin êm êm vek. Kan inkhel hi kan enlet leh ang a, hmasawn kan ngaihna laite kan sawi ho ang," tiin a sawi.

Spurs hian Arsenal leh Brentford te an inhnehtawkpui bak chu tun season league match bikah chuan hnehna an la chang vek. Tun kartawp hian Crystal Palace an lenchilh dawn, inkhel hmuhnawm an chhawpchhuah leh ngei a rinawm.