Lewy-a'n dam lam a pan zel

Barcelona fan-ten chanchin lawmawm hriat tur an nei a, hliam vanga chawl mek an striker chhuanvawr Robert Lewandowski leh forward Raphinha te chuan dam lam an pan mek.

Spanish chanchinbu lar Sport-in an tarlan danin, Lewy leh Raphinha te hi an lo kir hnai tawh a, chutihrual chuan zanina Shakhtar Donetsk an hmachhawn hunah erawh an rawn kir hman a la rinawm chuang lo.

Barcelona hian zanin dar 10:15-ah Champions League group stage match khel turin Shakhtar hi an mikhual dawn a, match hmasa pahniha hnehna chang Barca hian inrintawkna nen an lo mikhual ang.

Hriat tel atana ṭha erawh Catalan club hian an league match hnuhnung berah Athletic Bilbao chu 1-0 in an hneh hram a, a vawi khat nana Barca tana inlan, kum 17 mi Marc Guiu chuan minute 80-naah inkhela goal awmchhun hi a khung hram.

A tawi zawnga sawi chuan Barca-in goal khung tur an mamawh a, goal khung thei bik Lewy leh forward ṭha Raphina te an dam thuai Catalan club tan a ngai.

October thlatira inhliam Lewandowski hian tun season inelna hrang hrangah match 10 khel tawhin, goal ruk a khung tawh a, assist vawi li a nei bawk. Polish striker hi a kum a tam ve tawh avangin fans tam takin a hma phak loa a lo kir an hlauthawng takzet.

Raphinha hian tun season-ah match sarih khel tawhin goal hnih a khung hman a, assist vawi thum a nei. Barca tan player pahnih an dam leh vat a ṭul a, October 28 zanah Real Madrid nen El Clasico an khelh dawn avangin player pahnih dinhmun hian ngaihven a hlawh lehzual.