Jerry mawi zanah Odisha chak

Indian Super League chu Nilaini zan khan khelh chhunzawm a ni leh ta a, Mizo tlangval Jerry Mawihmingthanga chu Emerging Player of the Match atan thlan a ni. 

Odisha hian coach ban hlim Hyderabad chu khualmualah an lenchilh a, Marcelinho chuan mualneitu team tan second 40-na lekah goal khung mah se Odisha hian goal hniha chhangletin 2-1 in an chak. Mikhual team tan hian Aridane Santana chuan goal hnih a khung a, Spanish striker goal hnuhnung zawk hi penalty aṭanga lut a ni - first half hun pek belhah Hyderabad player  Dimple Bhagat chu a yellow card pahnihna pek niin hnawhchhuah a ni a, penalty a chawi bawk. 

Santana hian penalty hi harsatna awm loin goal-ah a chantir a, hun tawp thlenga goal dang lut tawh loin a chak zawkah an ṭang. Hyderabad hian 1-1 a nih laiin penalty an hlawh ve tho a, mahse Brazilian striker Bobo chuan goal-ah a chantir thei lo a ni. Odisha tan hian Lalchhuanmawia Fanai leh Daniel Lalhlimpuia chu bench aṭanga luhtir an ni a, Hyderabad lamah R. Laldanmawia chu squad-ah hmuh tur a awm lo.