Afghanistan-in Pakistan an 'BARAKHAIH'

Cricket World Cup 2023 a ngaihnawm tawlh tawlh - Thawhṭanni khan beisei loh result kan hmu leh ta a, Afghanistan chuan cricket ram ropui zinga mi Pakistan chu wicket riatin an barakhaih!

Pakistan hian tun World Cup-a an match hmasa pahnihah hnehna an chang a, match thumnaah India an ngam lo. Men in Blue laka an tlawm hnu hian an insiamṭha leh tawh lo a, match hnih an tlawm leh tawh.

Afghanistan tan Ibrahim Zadran chuan run 87 ngawt a vaw chhuak a, wicket thum latu Noor Ahmad pawh lam hmaih a thiang lo - CWC team tenau zinga mi hian match hnih hnehna an chang ve ta a, ODI match-a Pakistan an hnehna hmasa ber a ni bawk.

Pakistan beiseina

Pakistan-in bat hmasak an thlang a, Abdullah Shafique chuan run 58 a rawn siam nghal a, run 74 siamtu captain Babar Azam pawhin rintlak a nihzia a pholang.

Shaheens batter zingah Iftikhar Ahmed leh Shadab Khan ten run 40 ve ve an siam bawk a, Pakistan hian an tichhe hran lo - over 50-ah run 282 siamin wicket sarih an hloh a, Afghanistan theihna enin an himah ngaih a ni.

Kum 18 mi Noor Ahmad chu bowling lama Afghanistan inchhuanna a ni a, IPL club Gujarat Titans tana khel hian wicket thum a la a ni satliah lo a, a vawm out zingah run 58 siamtu Shafique leh run 74 siamtu Babar an tel.

Barakhaih!

Kum 2014 khan Afghanistan hian United Arab Emirates laka an target run 274 chu an lo um phak tawh a, an ram record a ni - mahse, heta an hneh UAE hi World Cup pawh khel phak lo an ni a, Pakistan laka run 282 um pha tura Afghanistan beisei a harsa.

Mahse, Afghanistan hian ngaihdan dang an nei. A tira rawn ding chhuak pahnih Rahmanullah Gurbaz (65 runs) leh Ibrahim Zadran (87) an che ṭha nghal a, Pakistan-in wicket an lak hmasak ber hian 21.1 over a ni tawh a, Afghanistan-in run 130 an vaw chhuak tawh bawk.

Batter ṭha pahnih an out ve ve hnuah pawh Rahmat Shah (77 runs) leh captain Hashmatullah Shahidi (48) te chuan run ṭha tak siama a tawp thleng damin an team an chakpui a, over 49-ah target an um phak a, wicket hnih chiah hlohin an chak.