Ajax leh coach Steijn inṭhen

Maurice Steijn leh Ajax chu inhriatthiam tawnna in an inṭhen, thla li chauh an thawhdun hnuah an inkar a tawp leh nghal tihna a ni. Assistant coach Hedwiges Maduro chuan a hmun ruak a luah lailawk ang.

Kum 49 mi Steijn hian June thla khan Ajax hi a zawm. Sparta Rotterdam aṭanga Ajax a pan hian beiseina sang tak an nei a, kum thum daih inremna an ziak.

Mahse, beisei angin season bul an ṭan ṭha lo. Dutch champion hi Eredivisie match sarih an khelh tawhah vawi khat chiah chakin table mawng lamah an talbuai.

ADO Den Haag, VVV-Venlo leh NAC Breda te pawh enkawl tawhtu hian league-ah chauh lo pawh result a nei ṭha chuang lo, inelna hrang hranga match 11 an khelh chinah vawi hnih chiah chak ni hmel an hmu.

Ajax chief executive Jan van Halst chuan, "Hna ṭha takin kan thawk ho a, thil ṭha tam tak pawh kan ti ho. Mahse, result a ṭhat loh avangin thil thlak thleng kual a ngai," tiin a sawi.