Chak mamawh PSG inlan dawn
Zanin dar 12:30-ah Paris St-Germain chuan AC Milan an mikhual dawn a, Champions League inkhel en châkawm pawl a ni - PSG hian Luis Enrique hnuaiah an beisei ang result an nei hleithei lo.
Spanish coach Enrique hoa indinthar tum mek PSG hian season ṭantirah beisei an phak lo a, league match hmasa pangaa vawi thum chiah an chak lai phei kha chuan sawiselna a ri hman. Mahse, tun hnaiah an inher rem hret.
French club hi an league match hnuhnung paliah tlawm an nei lo a, an insiamrem tawh. Hetihrual hian Newcastle United laka 4-1 a an tlawm avangin Paris club ṭantute an la tlawmngai reng a, zaninah European football beiseina an chhit nun a ṭul.
Siamthar lehna
Magpies laka an mualpho hnuah PSG hian match hnih khel leh tawhin, Rennes (3-1) leh Strasbourg (3-0) lakah hnehna an chang ve ve a, rilru tibuaitu ber erawh Kylian Mbappe a la 'form' hleithei lo hi a ni.
French striker hian tun season inelna hrang hrangah match 10 khelin goal kua khung tawh mah se, an match hnuhnung pangaah goal khat chiah a khung a, a goal khung awmchhun hi penalty aṭanga a chhuih luh a la ni zui!
PSG tan an theihna tak tak pholang turin nipui transfer laia buaina nei Mbappe a 'form' leh a ṭul a, PSG a pan hnua goal la khung lo Ousmane Dembele tan pawh goal khung a hun tawh - he team hian Randal Kolo Muani leh Goncalo Ramos te an la nei tho tih erawh theihnghilh lo ila.
Milan beiseina
AC Milan-in beiseina an nei sang viau a, mahse, tun season Champions League match hnih an khelh tawhah goal an la khung lo - an vanneihna erawh an khingpui Magpies leh Borussia Dortmund ten an khung bik lo a, point hnih an nei.
Milan hian an league match hnuhnung berah Juventus chu 1-0 in an ngam lo bawk - Serie A-ah hian match kua khela vawi sarih chakin, vawi hnih an tlawm a, hmahruaitu Inter Milan chu point khat chiahin an phak lo mek.
Chutihrual chuan an hneh loh pahnih hi an elpui Inter leh Juve an ni a, club lian laka chak dan thiam an zir a ṭul - zanin aṭanga ṭanin! Italian club tan Olivier Giroud a la rintlak reng a, Rafael Leão pawh PSG tlarhnung tana buaina thlen turin a ṭha tawk - Christian Pulisic a la awm bawk.