Nadal hi a la hlauhawm reng dawn - Goran Ivanisevic

Novak Djokovic-a coach Goran Ivanisevic chuan Rafael Nadal lo kir leh tur chu thil lawmawm a nih thu a sawi a, chutihrualin Novak tana elpui hautak leh khirh a nih leh nghal a rin thu a sawi.

Hliam vangin Nadal a buai rei ta hle - kumin January thlaa khelh zawh tak Australian Open hnuah tournament a la khel leh lo. Ruahman dan chuan season tharah a lo kir dawn, thla 10 chuang inkhel lo a nih avang erawh chuan a lakah besei neih san a harsa.

Ivanisevic chuan, "Rafa hi chu kan hrechiang, a inpeih thlap a nih loh chuan a lo kir lo ang. A lo kir dawn tih a sawi kha chuan inkhel turin a inpeih a, player ṭha dangte hmachhawn turin a inringtawk hle tawh tihna a ni.

"A lo kir tur hi tennis khawvel tan chuan a lawmawm, a chhan chu ṭantu a ngahin kan infiamna hian mi ngaihven a hlawh zual phah leh dawn a, hei hi kan zavai tan a ṭha a ni," tiin Nadal a dah sang thiam hle.

Nadal hian Grand Slam nomawi 22 a la tawh a, la hnem ber a ni ṭhin. Mahse, a inkhelh theih loh karin Djokovic chuan a rawn khum tawh a, tunah chuan Serbian star hian major title 24 a neiin a chungnung ber a ni tawh thung.

Spanish tlangval Nadal-a'n a tan champion beisei ngam chi a ni lo tih a sawi lawk tawh a, amaherawhchu a khingpui tur lam chuan hmachhawn an chak dawn lo tih a chiang nghal - season thar tihmuhnawmtu a ni leh ngei dawn.

Australian Open director Craig Tiley chuan Melbourne khawpuiah Nadal a inlan dawn tih a sawi chiang tawh, hei hi Australian Open champion lai Djokovic tan chuan ralkhel dar ri a ni nghal ang.