Empoli lakah Fiorentina an tlawm

Thawhṭanni zan Serie A inkhelah Fiorentina chu Empoli lakah 2-0 in an chak lo. Empoli tan hian Francesco Caputo leh Emmanuel Gyasi ten goal an khung a, mualneitu lamin a chhanletna tur an nei lo.

An inkhelhna hmun hi Fiorentina khelmual Stadio Artemio Franchi a ni a, mualneitu lamin goal khung theihna tur remchang vawi 18 tehmeuh insiam thei mah se a tak ram a thleng thei lo chu an tuar.

Fiorentina hi chak ni se la chuan tun season Serie A match vawi kua an khelh aṭangin point 20 an hmu ang, club record siam thei tur an ni. Mahse, point 17 an neih bak an hmuh belh theih tak loh avangin record an siam thei ta lo.

Fiorentina coach Vincenzo Italiano chuan, "Hetiang result hi chu thleng thei reng a ni, kan ṭhat tawk lohna laia min hrem chat thei team kan hmachhawn a, an lak aṭangin zir chhuah tur tam tak kan nei," tiin a sawi.