Haaland-a'n Ballon d'Or a phu - Antonio

West Ham striker Michail Antonio chuan khawvela footballer ṭha ber hnena pek ṭhin Ballon d'Or chu Lionel Messi aiin Erling Haaland chuan dawn a phu zawk thu a sawi a, City striker-in a dawn chu thil nih dan tur dik tak a nih thu a sawi.

Season hman zawh takah khan Haaland hian inelna hrang hrangah match 53 khelin goal 52 a khung a, treble nomawi an chawi theih nan a thawhhlawk hle. Hetihlai hian Messi erawhin World Cup-ah Argentina a champion pui a, best player atan thlan a ni bawk.

Antonio chuan, "Messi-a'n World Cup nomawi a chawi a, thil ropui tak a ni tih ka hria. Mahse, treble champion team leh chu team tana hna thawhhlawk tak Haaland en kan chu a fuh thei lo ang. Ballon d'Or a dawng ngei tur a ni a, a dawn loh chuan thil dik lo a awm a ni mai," a ti a, Newcastle United striker Callum Wilson chuan, "Season hmasaa Haaland hnathawh kha hmuh kan theih a ni lo," a ti ve bawk - October 30-ah Ballon d'Or dawng tur hi puan a ni dawn.

Hetihlai hian City boss Pep Guardiola chuan Barcelona-a a player hlui Messi lam hawiin, "Ballon d'Or hi hmun hnihah ṭhen mai rawh se. Pakhat Messi tan, pakhat chu midang zawng inchuh turin - Messi season chhe ber hi midang tan chuan a season ṭha ber a ni ṭhin," a lo ti tawh thung.

City hian zanin dar 12:30-ah Champions League match khel turin Young Boys an lenchilh dawn a, Manchester derby-in a hmuah zui avangin Pep-a'n engtiangin nge a team a rem dawn tih chu thil hriat châkawm a ni - match hnih an khelh tawhah an la chak ve ve.