Zarkawt BCA hmaa ding tur Tuikual South

Mizoram Super League season 2 chu nizan aṭang khan Hawla Indoor Stadium, Republic Vengthlangah khelh ṭan a ni a, vawiin tlai hian khelh chhunzawm tur niin tlai dar 4:00-ah Zarkawt Serpents leh Mission Veng Vikings an inkhel ang a; zan dar 8:00-ah season hmasa a pahnihna Zarkawt BCA leh Tuikual South an inhmachhawn ve leh ang.

BCA vs Tuikual

MSL1 final-ah BCA hian Khatla TBL an hneh lo a, pahnihna an ni. Nikum November thla khan Marova Memorial Basketball Tournament-ah erawh TBL lakah phuba lain nomawi an chawi thung.

BCA hian MSL2 khel turin state pawn player lakluh tum mah se a remchan tak loh avangin tualchhung player hlangin an khel dawn. An squad-a player pakua ngawt hi national level-a lo inlan tawh an nih avangin inrintawkna an nei tam dawn tih a chiang. Player ṭha awmkhawm zingah MSL1 lama mipui hmelhrait tawh small Forward David Lalruatfela leh point guard Michel F Lalawmpuia te an ṭangkai ang.

Hetihlai hian Tuikual South erawhin Haryana tlangval Rakesh an la lut thung a, zaninah erawh an la chhawr thei dawn lo thung. Chaltlang Ryders aṭanga an lakluh point guard Lalmuanpuia Zote chu an beiseina siamtu a ni dawn. Ramhlun North tlangval hian MSL1-ah khan point 219 zet a score a, ani aia score hnem an awm lo. Ani bakah hian kum hmasa lama team khaidingtu F Zodinthara an la nei bawk.

Season hmasa khan team pahnihte hi vawi hnih an inhmachhawnah vawi khat ve ve hnehna an chang a, an intiattawk hle. Zaninah pawh hian a chungnung zawk tur hriatthiam a harsa.

Eng nge an sawi?

Tuikual South coach KC Lalliantluanga chuan, "Kan khingpui tur BCA hi team
ṭha tak an ni a, player thar kan neih belh ve ve avangin hriatthiam a harsa rih hle. Kan veng mipui an phur a, inkhel hautak leh hmuhnawm a nih ka beisei," a ti.

Zarkawt BCA manager Malsawm-tluanga chuan, "Min ṭantu mipuite hi kan chakna hnar an ni a, zaninah pawh hian anni zarah ṭha takin kan khelh theih ka beisei. Kan player zingah hliam an awm loh avangin beiseina kan nei sang," tiin Vanglaini palai a hrilh.

Serpents vs Vikings

Mizoram Super League season hmasa khan Zarkawt Serpents leh Mission Veng Vikings-te hian match 10 an khelh aṭangin vawi li hnehna an chang a, vawi ruk an tlawm ve ve. Team pahnihte vawi hnih an inhmachhawnah vawi khat ve ve chakni hmel an hmu bawk a, an sulhnu en chuan an intiattawk hle.

Vikings hian India Under16 captain hlui Dishant V Shah an la chhawr thei dawn lo a, Serpents lam erawhin state pawn player Sahil Sharma leh Prince Chamuah-te chu chhawr theih an inbeisei thung.

Serpents manager Dino Laldinpuia chuan, "Tun season chu inthlahdah a thiang lo leh zual dawn a, chet sual a thiang lo tluk a ni. MSL chinah chuan team ṭha vek kan nih tawh avangin inkhel hautak hmachhawn turin kan inbuatsaih a, player-te fitness a
ṭhat avangin inrintawkna kan nei. Fans lam pawh an phurin anni ṭawiawmna hi kan tan a pawimawh hle ang," tiin a sawi.

Mission Veng Vikings coach Reuben Lalchhandama chuan, "Team dang ang bawkin kan ninbuatsaihna a ṭhain kan phur tlang tawh hle. Mimal ai chuan keini chu team anga thawhhona hi kan hmachhuan tur a ni ang," tiin Vanglaini palai a hrilh.