Santosh Trophy-a Mizoram dai chin
Kum 2010 khan Mizoramin India rama state-te football hmanga inelna sang ber Santosh Trophy-ah a vawi khat nan quarterfinal an lut a, hemi hma hian record an la nei ṭha ngai lo. Tun ṭumah hian kum 1999 aṭanga Mizoram thlen chin kan thlirlet ang.
55th Santosh Trophy (1999)
- Qualifying Round
Tamil Nadu-a Santosh Trophy khelhah hian Mizoram chu qualifying round-ah Services, Jammu & Kashmir leh Uttar Pradesh nen an awm ho a; March 17, 1999-a an match hmasa berah Services 3-0 in an hneh lo a, group mawngphah niin final round an thleng zo lo.
56th Santosh Trophy (2000) - Tel lo
Kerala-ah khelh a ni a, Mizoram hi qualifying round Cluster III-ah Railways, Andhra Pradesh leh Daman & Diu te nen an dah kawp. Mizoram hi inelnaa tel loin an inhnukdawk.
57th Santosh Trophy (2001) - Tel lo
Mumbai, Maharashtra-ah khelh a ni a, Mizoram hi Cluster III-ah Railways, Andhra Pradesh leh Nagaland-te nen dah kawp an ni0. Hemi kum hian Mizoram an tel lo a, an group-a awm tho Nagaland an tel lo bawk. 2016 Santosh Trophy qualifier Lammuala khelh zawh takah khan Arunachal Pradesh an inlan lo a, hei hian kum 2000 chho vela Mizoram dinhmun chu a tichiang viau awm e.
58th Santosh Trophy (2002)
- Qualifying Round
Imphal, Manipur-ah khelh a ni a, a thleng-tu Manipur chu champion niin North East
aṭanga champion hmasa ber an ni. Mizoram erawh qualifying round-ah Punjab leh Madhya Pradesh nen an awm ho a, final round lut turin match hnuhnung berah Punjab draw a tawk a, minute 88-ah Sher Singh-a'n Mizoram beiseina a ti tawp.
59th Santosh Trophy (2004)
- Qualifying Round
Delhi-ah khelh a ni a, qualifying round-ah Mizoramin an group-a awm West Bengal leh Andhra Pradesh te an hneh loh ve ve a, group mawngphah niin an tla nghal. Tripura coach Rajat Ghosh Dastidar chuan tun hmain goal difference siam ṭhat nan Mizoram tum an châk ṭhin thu a sawi a, a thusawi dikna chu record-ah a lang chiang hle.
Kum 2004 hian Mizoram-in Andhra Pradesh 2-0 in an hneh lo a, West Bengal-in group hmahruaitu ni turin Andhra Pradesh aia goal khung hnem an mamawh. Goalkeeper Rajat Ghosh telna West Bengal hian Mizoram hi 5-1 in an sawp a, group hmahruaitu an ni.
60th Santosh Trophy (2005)
- Qualifying Round
Kochi, Kerala-ah khelh a ni a, Mizoram hi Cluster VIII-ah West Bengal, Nagaland leh Andhra Pradesh-te nen an awm ho a. Mizoram hian final round lut lo mah se kum hmasa lakah chuan an record a ṭha a, hneh loh an tawng lo.
Mizoramin match hmasa bera Andhra Pradesh an draw hnuin Nagaland an hneh a, final round lut turin match hnuhnung berah chak ngei ngei mamawh mah se West Bengal nen 1-1 a an inhnehtawk avangin an tla.
61st Santosh Trophy (2006)
- Qualifying Round
Haryana-ah khelh a ni a, Mizoram hi Cluster II-ah Meghalaya, Uttar Pradesh leh Andaman & Nicobar Islands nen an awm ho. Mizoramin team ṭha lo Andaman & Nicobar Islands an hneh a, team dang pahnih Meghalaya leh Uttar Pradesh an hneh lo.
62nd Santosh Trophy (2008)
- Qualifying Round
Jammu & Kashmir-ah khelh a ni a, Mizoram hi Cluster VII-ah Railways leh Chattisgarh-te nen group khatah an awm a. An match hmasa berah Chattisgarh an hneh hnuah Railways an draw leh a; amaherawhchu goal difference-ah Railways an tluk loh avangin final round an lut lo.
63rd Santosh Trophy (2009)
- Pre Quarterfinal
Tiruchi, Tamil Nadu-a Santosh Trophy khelhah Mizoram hi Cluster III-ah Madhya Pradesh, Jammu & Kashmir leh Pondichery te nen group khatah an awm ho a, a vawikhat nan qualifying round an paltlang. Amaherawchu pre quarterfinal-ah Goa hneh loin an tla.
64th Santosh Trophy (2010) - Quarterfinal
West Bengal-a Santosh Trophy khelhah Mizoramin a vawikhatnan quarterfinal an thleng a. Qualifying round Cluster VIII-ah Railways, Orissa leh Bihar nen awm hoin, match hmasa berah Orissa lakah tlawm mah se qualifying round hi an paltlang tho. Pre quarterfinal-ah Beikhokhei-a goal hmanga Kerala hneh lehin quarterfinal an lut a; amaherawhchu quarterfinal-ah Tamil Nadu, West Bengal leh Delhi nen an awm ho a, group mawngphah niin an tla.
65th Santosh Trophy (2011)
- Qualifying Round
Kolkata-ah Mizoram team hi Cluster VII-ah Haryana, Madhya Pradesh leh Tripura-te nen group khatah an awm ho a, an match hmasa berah mak tak maiin Tripura lakah 3-1 in an tlawm nghal a, team dang pahnih sawp ve ve mah se goal difference aia head to head a pawimawh avangin Mizoramin beiseina a thamral.
66th Santosh Trophy (2012) - Quarterfinal
Assam-ah Mizoram hi Cluster VI-ah Uttarakhand leh Rajasthan nen an awm ho a, heng team pahnihte hi awlsam taka hnehin quarterfinal an lut a. Quarterfinal-ah Tamil Nadu, Railways leh Delhi te nen group khatah an awm ho a, group mawngphahah awmin semifinal an thleng zo lo.
67th Santosh Trophy (2013)
- Qualifying Round
Uttar Pradesh-ah Mizoram hi qualifying round-ah Uttar Pradesh leh Maharashtra nen group khatah awmin, pahnih tlang tur a nih avangin hna hautak tur niin a lang lo. Mahse, Mizoram hian an match hmasa berah Maharashtra 1-1 in an draw a, an match hnihnaah Uttar Pradesh lakah 1-0 a an tlawm leh avangin quarterfinal an lut zo lo. 2013-ah hian Services an champion a, top scorer chu Mizo tlangval Lallianmawia a ni.
68th Santosh Trophy (2014) - Champion
Mizoramin a vawi khat nan Santosh Trophy North East Zone Qualifier a thleng a, inelna thlengtu hi Group A-ah Manipur, Nagaland leh Arunachal Pradesh-te nen awmin a sang ber tan chauh final round luh theih a ni. Mizoram hian match hmasa pahnihah Nagaland leh Arunachal Pradesh te hneh mah se goal difference-ah Manipur an tluk loh avangin match hnuhnung berah chak a ngai a, an mamawh angin hnehna an chang bawk.
Mizoram hian match hnuhnung berah Manipur 2-0 in an hneh a, qualifier-ah goal an chhuah lo. Siliguri, West Bengal-a khelh final round-ah Mizoram an che ṭha chhunzawm a, an group-a team ṭha pali Maharashtra, Kerala, Services leh Uttarakhand te an hneh vek.
Mizoramin semifinal an vawi khat khelhnaah Tamil Nadu chu hun pangngaia 1-1 an draw hnuin extra time-ah goal hnih khung belhin 3-1 in an hneh. Final-ah Mizoramin hemi kuma North East aṭanga tling tho Railways an hmachhawn a, 3-0 in an hneh. Mizoram champion puitu coach hi H. Vanlalthlanga a ni a, hemi ṭuma assistant coach HC Zarzoliana hi tun ṭuma Mizoram coach a ni.
69th Santosh Trophy (2014) - Semifinal
H. Vanlalthanga'n a ṭum hnih nan Mizoram a kaihruai a, Tripura leh Meghalaya hnehin harsatna nei loin final round an lut.
Punjab-a final round khelhah Mizo-ramin Delhi, Kerala leh Railways te an hneh hnuin match hnuhnung berah Goa an draw a, semifinal an lut. Amaherawhchu Mizoram an vanduai zui a, semifinal-ah inelna thlengtu Punjab nen hun pangngaiah 1-1 in an inhnehtawk a, penalty shootout-ah an vanduai.
Kumin hian Santosh Trophy vawi 70-na chu Nagpur, Maharashtra-ah khelh a ni dawn a, Manipur hnehtu Mizoramin inelna neihna hmun tur hi nimin khan an thleng. Mizoram hian Thawhṭanni hian an match hmasa berah 2014 final-a an hneh Railways an hmachhawn ang.