Vawiinah FIFA president thar thlan a ni dawn
Football khawvela thuneitu sang ber FIFA chuan vawiin hian Zurich khawpuiah president thar thlanna an nei dawn a, Switzerland khawpui pakhata FIFA headquarters lam hi football khawvelin a hawi ang.
Eng nge thleng dawn?
Kum 2015-ah FIFA chu eiruk thubuai hrang hrangah a hmingchhia a, hei vang hian president nilai Sepp Blatter chuan June thla khan president aṭanga a ban tur thu a sawi a, Swiss pachal thlaktu tur thlanna hi February 2016-a neih tura ruahman nghal a ni.
Vawiinah FIFA hnuaia ram 209 Zurich khawpuiah hian an pungkhawm dawn a, FIFA presidential candidate panga zing aṭanga an duh ber an thlang chhuak ang.
Mahse, member-te hian presi-dent thlanna neih a nih hmain FIFA siamṭhatna tura ruahmanna an siamte chu an pawm vek phawt a ngai dawn a, pawm a nih hnuah vote an thlak chauh dawn a ni.
Eng nge ruahmanna chu?
Eiruk vanga FIFA hming-chhe mek a zia theih nan FIFA hruai-tute hlawh zat vantlang hriatah puanchhuah a ni ang a, FIFA hotu ni turin term hun chhung bituk a ni.
FIFA executive committee awm ṭhin chu ṭhiah a ni ang a, member 36 awmna FIFA council din a ni ang. He council-ah hian a tlem berah hmeichhia panga tal an awm ang.
Corporate executive board ang-in General secretariat thar ruahman a ni ang a, com-pany-a CEO angin FIFA secretary general chuan thu-neihna a nei dawn a ni.
FIFA sum chevel reng reng chu committee hrang hrangin an ennawn ṭhin ang a, engkim lantlang taka ruahman vek a ni ang.
Mahse, heng ruahmanna zawng zawng hi FIFA member 209 zinga 75% hian an pawm a ngai dawn a, pawm a nih loh chuan president thar thlang tur hian vote thlak theih a ni dawn lo a ni.
Engtinnge vote thlak a nih dawn?
FIFA hnuaia ram 209 zinga ram 207 chiahin vote an thlak dawn a, hei hi vote thlak thei lo tura Kuwait leh Indonesia-te hrem an nih vang a ni.
Vote thlak hmasak berah candidate zinga hmun thuma ṭhena hmun hnih vote hmu chu tlingah puan an ni ang a, heti zat vote hmu an awm loh chuan vote 207 aṭanga vote 105 hmu chu tlingah puan an ni ang.
Round one leh Round two-a vote hmuh ngai zat hmu thei an awm lo a nih chuan round three neih a ni leh ang a, round two-a vote hmu tlem ber candidate erawh round three-ah hian paih chhuah a ni dawn thung a ni.
Blatter & Platini
FIFA president thlang tura football khawvel a buai lai-in football kaihhnawiah inhnam-hnawih thei lo tura kum riat chhung atana hrem Sepp Blatter leh Michel Platini-te chuan hrem an nihna chu hlihsak turin FIFA hnenah ngen mah se pawm sak an ni lo a, kum riat chhung hrem tura tih an nihna erawh kum rukah tih hniam sak an ni.
Tu te nge inlan dawn?
FIFA president nih tum hian Prince Ali bin al-Hussein, Sheikh Salman bin Ebrahim al-Khalifa, Gianni Infantino, Tokyo Sexwale leh Jerome Cham-pagne-te an inkhing dawn a, president thar chu kum 1998-a Blatter hnua FIFA president ni leh thei hmasa ber an ni ang.
Gianni Infantino
Kum 45-a upa UEFA general secretary nilai hian football khawvelah kum 15 chhung hun a hmang tawh a, kum 2000 khan dan hremi angin UEFA a zawm a, University of Neuchate-a International Centre for Sports Studies (CIES)-ah secretary general a lo ni tawh bawk.
Tokyo Sexwale
Kum 62-a upa South Afri-can sumdawng hausa hian football khawvelah kum sarih vel a hun a hmang tawh a, South Africa-ah minister hial ni tawhin vunrawng inhmuhsitna do kawnga nasa taka ke a pen avangin kum 13 chhung lung inah khung a lo ni tawh.
Prince Ali bin al-Hussein
Jordan Football Association president nilai leh West Asian Football Federation dintu hian kum 16 chhung football khaw-velah a hun a hmang tawh a, FIFA vice-president hial lo ni tawh a nih avangin kum 40-a upa Jordanian hi a dinhmun a ṭha hle.
Jerome Champagne
International football-a consultant ni lai French pachal hi kum 11 chhung Sepp Blat-ter-a hnuaiah adviser a lo ni tawh a, football khawvel huang chhungah kum 17 chhung a hun a lo hmang tawh.
Sheikh Salman bin Ebrahim al-Khalifa
Kum 50-a upa Asian Football Confederation president leh FIFA vice-president nilai hian football khawvelah kum 17 chhung hun a lo hmang tawh a, a thawm a lian hran lo.