Inter Milan-ah Mauro Icardi a nghet

Inter Milan captain Mauro Icardi chuan San Siro chhuahsan tumna a neih loh thu leh a club chu champion nomawi chawi pui ngei a tum thu a sawi.

Inter striker hi tun hnaiah Premier League lam nen nasa taka sawi zawm a ni a, Manchester United leh Ar-senal-te'n lakluh an duh nia sawi a ni.

Argentina international hian kum 2013 khan Sampdoria aṭangin Inter hi a zawm a, inelna hrang hrangah match 95 khel tawhin goal 47 a khung tawh a, kum 23 chauha upa la ni mah se khelmual chhungah erawh a puitling tawh thung.

A hmalam hun sawiin Icardi chuan, "Inter legend Javier Za-netti ang khan he hmunah hian nomawi leh chawimawina dawn ka duh a, hruaitu ka nih avangin mawhphurhna pawh ka nei sang hle. Tunah chuan season thara Champions League khel tura a sang pathum zinga tel hi kan tum hmasak ber a ni," tiin a sawi.

Tun season Serie A match 26 khelh tawh aṭangin Inter hian point 48 an hlawhchhuak tawh a, league table-a pathumna Fiorentina chu point liin an phak lo mek a ni.