Champions League Khualmuala chak City dinhmun a tha

FA Cup fifth round-ah Man-chester City-in Chelsea hneh loin an mualpho a, player naupang rual hruaitu manager Manuel Pellegrini-a'n Champions League a ngaih pawimawh vang a nih thu a sawi.

Nilaini zana Europe-a club inelna sang ber inkhelah Chilean manager-in a thusawi nemngheh nan Ukraine-ah player ṭha rual a hruai a, Champions Leagus last 16 first leg inkhelah Dynamo Kiev chu 3-1 in an hneh.

Mikhual team City tan Sergio Aguero, David Silva leh Yaya Toure-te'n goal khat ṭheuh an khung a, Vitaliy Buyalsky chuan mualneitu team tan goal khat a khung ve bawk.

City an chungnung

Inkhel ṭan aṭanga minute 15-na lekah Aguero-a'n goal hmahruai a khung nghal a, Argentine striker hian chance dang a neih chhunzawm bawk.

Mahse, Champions League match 17 inkhel bul a ṭan aṭanga goal 16 khungtu striker hian a hun ṭha neih vawi hnih chu goal pawn lama a pet bakah kum 41-a upa keeper Olexandr Shovkovskiy chuan ṭha takin vawi khat a dan sak bawk.

Minute 40-naah City-in David Silva hmangin an goal hnihna an khung a, Kiev khelmuala an goal hnihna khung tura City ball inpe kual vel hi hmuhnawm tak a ni.

Ukrainian club-in Vitaliy Buyalsky hmangin minute 58-naah goal khat an khung ve leh a, kum 23-a upa midfielder hian chance ṭha dang neih chhunzawm mah se City keeper Joe Hart chuan ṭha takin a dan sak bawk.

Second half-ah mualneitu team khel ṭha mah se City an insiamrem thuai a, minute 90-naah Yaya Toure chuan an chak nemnghehna goal a khung. Dynamo Kiev tan goal dang khungna hun a awm tawh lo a, Champions League quarterfinal lut tur chuan Etihad Stadium-ah goal thum tal an khung a ngai tawh ang.

City dik tak

Manchester City-in season tharah chuan Pep Guardiola-a'n an team a kaihhruai tur thu an puang a, City thu puanchhuah hunin sawisel a hlawh a, khel-mual chhungah nghawng a neih hlauthawngtu an tam.

Hlauhthawn ang ngeiin Guardiola-a'n City a enkawl tur thu puanchhuah a nih hnuah English club hian match li an khel a, vawi khat chiah an chak. An player neih dan enin hei hi result chhia a ni.

Mahse, Nilaini zan Cham-pions League inkhelah erawh Manchester City-in team ṭha an ni tih an pholang a, ball an chang tam a, Europe-a team
ṭha pawl an ni tih an pholang.

City captain Vincent Kom-pany chuan, "Game harsa takah ṭha takin kan khel a, 3-1 a chak hi result ṭha tak a nih avangin kan lawm a ni," tiin an khelh
ṭhat thu a sawi.

Belgian defender chuan sawi chhunzawmin, "Quarterfinal lut turin kan chance a ṭha tawh a, second leg-ah hlauthawng loin kan khel thei dawn a ni. Hlawhtlin châka team tuihal tak kan niin ka hria," a ti.

Silva & Kompany nghawng

Pellegrini-a'n right wing-a a chhawr ṭhin Silva khelhna thlakin striker Aguero hnung chiahah a khelhtir a, Chilean manager hian a tisual lo.

Right wing-ah Fernandinho a khel a, tlarhnung pui turin midfield laiah Fernando leh Toure an tawlh hnung a, tlarhma lamah duhtawka Silva a tal theih avangin Spain international che vel hi hmuhnawm tak a ni.

Kar sarih chhung hliam vanga a chawlh hnua a match hnihna kheltu Kompany a khel ṭha a, Citizens tlarhnung khaikhawmtu niin Dynamo Kiev tlarhmate'n an paltlang thei meuh lo.

Talbuai Kiev

Dynamo Kiev-in December 9-a Champions League group stage-a Maccabi Tel Aviv an hneh hnuah Ukrainian football thlasik chawlh vangin competitive match an la khel leh lo a, khelmual chhunga an khelh danah a lang chhuak.

Mualneitu team hian ball an inpe fuh hleithei lo a, game rang tak khel City lakah hmunawl an insiam thei lo bawk. Inkhelh hmaa sawi hlawh Andriy Yarmolenko-a'n beisei a phak lo a, Arsenal leh Everton nen pawha sawi zawm lo ni tawh forward hian City tlarhnung a chhiah buai thei meuh lo.

Eng nge an sawi?

Manchester City manager Manuel Pellegrini chuan, "Re-sult ṭha tak kan hlawh chhuah avangin ka hlim hle a ni. Second leg a la awm avangin kan la khel zo lo a, mah se khualmualah goal hnih laia hma kan hruai avangin kan dinhmun hi a ṭha a ni. Ka nauten an khel ṭha a, 2-1 a nih khan talbuai deuh mah ila kan goal thumna kan khung leh thei a ni," a ti.

Season thar aṭanga City chhuah-san tur manager chuan sawi chhunzawmin, "Quarterfinal kan la lut chiang lo tih hi kan pawm tur a ni. Football-ah chuan thutlukna hi awlsam taka siam chi a ni lo a, kan goal thumna khan chance min pe ṭha tih erawh sawi bo chi a ni lo," tiin quarterfinal lut tura an dinhmun a ṭhat thu a sawi.

Dynamo Kiev boss Sergei Rebrov chuan, "Thlasik chawlh kan hman avangin kan talbuai a ni lo a, thudik tak chu Europe-a team ṭha ber pawl kan tum avangin kan khel ṭha lo a ni zawk. Champions League last 16-a kan inlanna hmasa ber a nih avangin ka naute an zam deuh a, City-in goal an khung rual khan inrintawkna kan hloh a ni. Goal kan khung hnuah erawh kan si phurh sut zawh theih beiseina ka nei a, mah se kan hun neih kan chhawr ṭangkai tawk lo," tiin chak loh chhuanlam a siam lo.

City Hmabak

Manchester City-in League Cup final khelh tur an nei a, February 28 zan dar 10:00-ah Liverpool nen Wembley Stadium-ah nomawi chawi tumin an inhmachhawn ang.

Inkhel chhehvel

• Manchester City hi October 2007-a Manchester United-in Dynamo Kiev an hneh hnua English club khualmuala Champions League match-a Ukrainian club hneh thei hmasa ber an ni.

• Raheem Sterling chu Champions League-a inkhel a hmachhawn hnuhnung paliah goal ngaah a inrawlh a, goal thum a khung bakah a ṭhiante thun tur vawi hnih a siam sak bawk.

• David Silva-a'n Kiev lama goal a khung hian a career-a a vawi khat nan Champions League match-ah a zawnin goal a khung.

• Manchester City-in Champions League-a match 35 an khelh tawhah goal a lut lo ngai lo a, heng zinga match liah chiah hian goal an chhuah lo bawk.