AFC Cup-ah Bagan-in Chakin bul an ṭan

26th February, 2016

I League champion Mohun Bagan-in AFC Champions League khel pha lo mah se AFC Cup-ah erawh bul an ṭan ṭha hle. Mariners hian Ni-laini zan khan an match hmasa berah Maldives club Maziya Sports and Recreation Club chu 5-2 in an sawp a, Bengaluru FC erawhin an match hmasa berah Lao Toyota FC chu 1-2 in an hneh lo thung.

Jeje show

Mizo tlangval Jeje Lalpekhlua'n a vanglai hun a hmang chho zel a, goal khung a bansan thei lo. Guwahati-a inkhelah Sony Norde chuan freekick aṭangin Mariners goal hmahruai a khung a, Jeje leh Cornell Glen te'n goal hnih ve ve an khung bawk.

Jeje goal khung pa-hnih hi striker nazawng khung theih a ni lo a, Bagan goal hnuhnung ber hi Jeje-a ball pet ṭha zet Maziya keeper dan per hnu Glen-a khung a ni. Mariners defender-te fimkhur tawk loh vangin mikhual team-in goal hnihin an chhang let a, Ahmed Imaaz chuan goal thum an chhuah hnuah Maziya tan a pet goal a, Bagan defender Raju Gaikwad chuan an lamah a ti lut bawk.

Mohun Bagan hi goal an khung tam zarah Group G hmahruaitu an ni a, pahnihnaah South China 2-1 a hnehtu Yan-gon United an awm. Mariners hian March 9 khian khualmualah South China an hmachhawn dawn a, he inkhel tur vang hian I League-a Aizawl FC nen March 5-a an inkhel tur chu March 26-ah sawn a ni.

Bengaluru chak lo

Vientiane, Laos-ah Benga-luru-in captain Sunil Chhetri an chhawr thei lo a, mualneitu Lao Toyota FC chu 1-2 in an hneh lo.

Bengaluru tan India junior captain hlui Daniel Lalhlimpuia chuan club tana a match hmasa ber a khel a, Serchhip tlang--val hian minute 69-na-ah Sampingiraj a thlak. I League club tan hian Lalthuammawia, Lal-chhuan-mawia Fanai leh Beingaichho Beikhokhai te'n starting eleven an chang a, Malsawmzuala'n second half ṭantirah Alwyn George a thlak bawk. Tun ṭum hi Bengaluru Mizo player pangate a ruala an inlan vek vawi khatna a ni.

Lao Toyota hian first half-ah goal hnih an khung a, Bengaluru FC-in hun tawp dawn ṭepah CK Vineeth hmangin goal khat an khung a, point an hlawh chhuak zo lo.

Group H-ah 8-1 zeta Ayeyawady United sawp-tu Johor Darul Ta'zim chu hmahruaitu an ni a, Bengaluru FC-in March 9 khian Malaysian club Johor Darul Ta'zim hi an hmachhawn ang.