Inter Village U16 football ṭan hun sawn

26th February, 2016

Kum 16 hnuai lam tana foot-ball inlena Mizoram Football Asso-ciation-in a buatsaih tur chu March 7, 2016 aṭanga ṭan turin ruahhmanna siam vek ni tawh mah se, zirlai exam hunlai a nih avangin inelna hi March 15, 2016-ah sawn a ni.

Inter Village Under 16 football tournament hi veng leh veng inelna a nih angin Village Coun-cil/Local Council khat aṭangin team pakhat chauh a chhuah theih a, khawi VC/LC hming pawhin a chhuah theih bawk. Amaherawhchu hmundang VC/LC hmingpu turte chuan an chhuahna hming neitu VC/LC aṭangin pawmpuina fel fai tak an nei tur a ni.

Inelna ṭan hun sawn a nih takah chuan entry fee pek hun pawh March 15, 2016 thleng pawhsei a ni a, entry fee hi MFA Office, City Park, Aizawlah pek theih a ni. Team pakhat tan entry fee hi Rs 500 a ni a, Rs 20-in prospectus lei nghal theih a ni.

Football hmasawnna

Kum 2011 khan Mizoram Foot-ball Association chuan All Mizoram Inter Village Under 17 Football Tournament an lo buatsaih tawh a, team 144 zet inlanin a hlawhtling hle.

Ramhlun Sports Complex-a final khelhah Venghlui U17 team chuan Chhinga Veng U17 team chu 2-1 a hnehin an champion. Venghlui-in Under 17 inelna hi an vengchhunga football harhtharna atan an hmang a, an veng club Venghlui FC chu ṭha zawkin an kalpui chho bawk. Aizawl DFA hnuaia club Venghlui FC hi kumin kumtir khan ADFA Tournament-ah an champion a, season thara First Division khel turin an inhlangkai.

Pahnihna Chhinga Veng-in Under 17 inelnaa an tluk loh Venghlui aiin club football-ah record an nei ṭha zawk. Kumin season ṭantirhah Chhinga Veng FC-in bul ṭan ṭha lo mah se season chawhnu lam hmang ṭhain ADFA First Division League final-ah Aizawl FC Academy hnehin an champion. Chhinga Veng FC hian MPL5 Qualifier-ah Ramhlun North tluk lo mah se MPL5 Playoff-ah Luangmual FC hnehin season thar-ah MPL an khel dawn.

Kum naupang zawk inelna hi veng tan a ṭha a, footballer ṭha zawk chherna a ni bawk. Kum 2011-a MFA buatsaih Under 17 inelnaah hian MS Dawngliana, Lalchhanhima, Lalruatthara, Rochharzela leh player ṭhahnem takin tualchhung football-ah hming an chher zui a. Most promising player-a thlan Isaac Vanmalsawma chu tun season Shillong Lajong I League squad-ah a tel.