Arsenal-in Old Trafford an pan dawn

Premier League palian pa-hnih Manchetser United leh Arsenal-te chu Pathianni zan dar 7:30 hian Old Trafford-ah an inhmachhawn dawn a, inkhel result hian season tawpa an awmna tur a hril thui tawh ang.

League table hmahruaitu Leicester City point hniha phak lo mektu Arsenal hian champion nomawi chawi an duh a nih chuan point thum hmuh an ngai tawh a, Manchester United hian season thara Champions League khelh an beiseina vawng nung turin point hloh a thiang tawh lo thung.

Hmun ralṭi

Old Trafford hi Arsenal tan hmuh ralmuang a ni lo, kum 2004 khan match 49 chhung hneh loh nei loa an kaltluang lai chu he hmunah hian Ruud van Nistelrooy leh Wayne Rooney te goal hmangin United hian an lo tih tawp sak tawh. Kum 2011 khan he hmunah bawk hian Gunners hi 8-2 in an lo tlawm tawh bawk a ni.

Season chawhma lan khan team pahnihte hi Emirates stadium-ah an lo inhmachhawn tawh a, Arsenal-in 3-0 a hnehna changin a zawna match riat chhung an hneh theih tawh lohna record duhawm lo an thai bo. Mahse, zanina an inkhelhna turah erawh hi chuan a zawnin match riat chhung chakni hmel an hmu tawh lo a ni.

United-in hliam an ngah

Louis van Gaal-a'n Gunners hma--chhawn turin hliam vang-in a neih zinga ṭha ber a chhawp chhuak thei dawn lo, tun dinhmunah United player 13 Anthony Martial (malpui), Will Keane (ṭhâl), Cameron Borthwick-Jackson, David de Gea (khup), Wayne Rooney (khup), Matteo Darmian (dâr), Marouane Fellaini (tihrâwl), Adnan Januzaj (malpui), Ashley Young (ṭhâl), Bastian Schweinsteiger (khup), Phil Jones (ke rek), Antonio Valencia (ke phah), Luke Shaw (ruh tliak) te chu enkawl mek an ni a, an ṭhat ber lai a ni lo.

Amaherawhchu, United hian an match hnuhnung berah FC Midtjylland chu 5-1 a an sawp theih avangin inrintawkna an nei tura ngaih a ni.

Sapui hliam

Arsenal hian Thawhleh zan khan Champions League-ah Barcelona 2-0 in an hneh lo a, Arsene Wenger-a'n a naute an puitlin tawh thu a sawi fo a, United hmaah hian an puitling tak tak em tih chu fiahin a awm dawn. Hun harsa an paltlang thei a nih chuan league title beiseina a sang zual ang a, an che sual nawn leh a nih erawh chuan 'next season' an nghah leh a ṭul ang.

Gunners hian hliam vangin Alex-Oxle Chamberlain an chan dawn a, mahse Danny Welbeck, Mesut Ozil, Alexis Sanchez leh Olivier Giroud-te chhawr theih an ni dawn thung.