Santosh Trophy Tu nge Final Round khel dawn?

Mizoramin Santosh Trophy Final Round-ah a zawnin vawi thum an inpet tling a, 2014 champion hi nomawi chawi tura rinkai niin Group A-ah an awm.

Group A lam

Services : Vawi li champion tawh leh champion lai Services hian South Zone Group A aṭangin an inhlangkai. Services hian India rama football inelna sang ber thleng turin Pondicherry (12-0), Andhra Pradesh (4-1) leh Karnataka (3-2) in an hneh.

Jammu & Kashmir : North Zone aiawh Jammu & Kashmir hi rinkai an ni pha lo a, final round an thlen chhan hi qualifier an thlen vangah a ngaih theih bawk. J&K hian ṭum danga final round lut ṭhang Delhi nen an point hmuh zat a inang a, goal difference hmanga tling an ni.

Railways : East Zone Group B-ah Railways leh Jharkhand te an inel tawk a, match tawp berah goal awm loin team ṭha pahnih hi an inhnehtawk a, goal difference hmangin Railways an vannei zawk. Railways hian player ṭha luh khawmna ni mah se 1986-87 hnuah an la champion leh lo.

Maharashtra : West Zone-ah team panga Goa, Maharashtra, Gujarat, Madhya Pradesh leh Daman & Diu te an awm a, record nei ṭha Goa leh Maharashtra an ṭha fal nalh. State football team nei ṭha pahnih hian an khingpui an sawp vek a, match hnuhnung berah Goa-in Maharashtra hi 4-1 in an sawp. Mizoram an vannei a, team chhe zawka ngaih Goa an group-ah an awm.

Group B ve thung

Punjab : Nikum finalist Punjab-in North Zone Group B aṭangin final round an lut a, Haryana nen inhnehtawkin an point hmuh zat inang chiah mah se goal difference-a an ṭhat zawk avangin final round an lut. Vawi riat champion tawh Punjab hi nikum semifinal-a Mizoram ti tlatu an ni.

Tamil Nadu : Santosh Trophy-a la champion si loah chuan vawi hnih final lut tawh Tamil Nadu hi dah hniam theih an ni lo. South Zone Group a-ah Tamil Nadu leh Kerala an awm dun a, vawi nga champion tawh Kerala chu goal difference hmangin final round an lut pha lo.

West Bengal : Vawi 31 zet champion tawh West Bengal hi champion ngun ber an ni a, qualfier-ah Sikkim leh Orissa hnehin final round an lut. West Bengal hian kum 2011 hnuah champion nomawi la chawi leh lo mah se India ram football-ah chuan dah hniam theih an ni lo.

Assam : Nikum khan Assam-in Manipur hnehin final round an lut a, inelna tak takah hneh an nei lo. Tun
ṭumah hian Meghalaya hnehin final round an khel leh dawn a, Lammuala an khelh dan aṭanga thlirin North East aiawh Assam hian semifinal an thlen theih a rinawm loh.

Goa : Santosh Trophy-a vawi nga champion tawh Goa-in tun hnaia record an neih ṭhat loh avangin an intuaithar leh mek a, qualifier an khelh dan aṭangin a rah a lang chho ṭan niin lang. Vawi nga champion tawh Goa hian final round lut turin goal 20 an khung a, an khingpui zawng zawng awlsam takin an hneh vek.