Chaltlang chungah Khatla an ride
Khatla TBL-in Mizoram Super League season thar hawn-na inkhelah champion zia an chhuah a, harsatna nei loin Chal-tlang Ryders chu 92-83 in an hneh.
Ningani zana Hawla Indoor Stadium, Republic Vengthlanga inkhelah hian TBL tan H. Laldin-sanga'n (Mapuia) hun pawi-mawhah player ṭha bik a ni tih a lantir a, tun season-a Ryders aṭanga TBL zawmtu David Lalrinchhana chu player langsar ber a ni.
RV Duo
Chaltlang Ryders-in center Vishal Kumar Gupta leh shooting guard Rachit te an chhawr nghal a, amaherawhchu MSL danin playing five-ah state pawn player pakhat bak hman a phal loh avangin Ryders-in RV Duo hi an duh angin an hmang ṭangkai thei lo.
Feet ruk leh inches sariha sang Vishal-a'n khelhna hun chang tam zawkin TBL lakah a sanna hmang ṭangkaiin point 13 neiin rebound vawi riat zet nei mah se a puitlin tawk lohna a lang a, vawi sarih zet free throw a hlah. Rachit a che rang a, khelhna hun an pe tam lo nachungin point 19 a nei a, vawi thum steal a neih avangin Ryders chak loh chhanah Delhi lam chhuak hi dem theih a ni lo.
Ryders tan VR4 aṭanga an lakluh K. Lalchhuanawma (13 pts) leh H. Thangliana (11 pts) te an che ṭha a, amaherawhchu veteran player Richard Hming-liana erawhin point 8 nei mah se mawhphurhna a la tluan thei lo. Ryders captain hian hun pawimawh turnover vawi hnih a nei a, TBL chak awlsamna chhana ngaih theih a ni.
MVP - Mapuia
Khatla TBL-in ṭan tirh phatah 7-0 in hma an hruai a, a tawp thlengin hma an hruai tluan. TBL hian City Po-lice zawm vangin MSL1-a match zawng zawng khel kim vek Nelson Lalrohlua, Gospel Lalthanmawia leh R. Lalmalsawma te an kawl tawh lo a, chutichung chuan coach leh player nikawp Mapuia'n team ṭha a din thei tho.
Starting five-ah MVP nilai Mapuia leh Vanlalmuana te an tel lo a, player thar David bakah captain Lana, Papuia, Eddie leh Rina te'n coach rinna an tihlawhtling. Tlangnuam tlangval David-a'n season liam taa Ryders tana match khata a score chawhrual chu point 9.29 a ni a, TBL tana a match hmasa berah point 21 a lut - coach Mapuia hnuaiah harhtharna a chang. Champion lai tan hian captain Lana, Vanlalmuana, Papuia leh Juju te an khel ṭha bawk.
Player angin Mapuia a che
ṭha tel a, mamawh hunah chauh court chhungah a lut a, India player hlui hian Ryders che
ṭha tur a titawp zel. A khelh zat aṭanga chhutin Mapuia'n point 19 a score hi a ropui a, a point luh aṭanga a chanve aia tam hi a pawimawh vek. TBL guard hi Most Valuable Player a ni a, season ṭan zan chuan MVP lam pum chu 'Mapuia is a Valuable Player' tihna ni awm tak a ni.
An lungawi lo
Post match interview-ah Ryders coach Peter Lalrin-tluanga'n referee-te chu an chak lohna chhan pakhata a ngaih thu a sawi a, TBL player-te'n an RV duo te laka an foul chu hmu fuh loah a ngaih thu a sawi. Vanglaini palai hnenah insawifiahin Ryders boss chuan, "Referee chet dan ka sel lo a, an hmasawnna lai tur ka sawi lang zawk a ni. MSL2-ah referee thar an awm nual a, an inpekna ka fak a, hma an sawn ngei pawh ka ring," tiin referee-te a fak.
An team khelh dan chung-chang sawiin Peter-a chuan, "Boruak sangah Rachit leh Vishal ten practice-naa an theihna an la hmang lo a, kan khelh danah siam ṭhat tur neuh neuh a awm bawk. Zarkawt Serpents kan hmachhawn hunah chuan kan insiamṭhat theih ngei ka ring," tiin a sawi.
Player leh coach ni kawp Mapuia chuan, "Kan chak avangin ka lawm a, kan khelh danah erawh ka lawm lo. Kan luh theihna mai turah luh loh kan ngah a, practice kan la pha lo," tiin Khatla TBL ṭha zawk hmuh tur a awm thu a sawi.
MSL hmasa berah inkhel entu an ṭhahnem a, amaherawhchu season ṭantirh a nih vang nge MSL1-a au thiam Khatla TBL ṭantute'n team dang nena an danglamna an la phochhuak lo. Chaltlang Ryders ṭantute an dang bik lo, player-ten tiphurtu an mamawh laiin awmze neiin thawm an siam sak lo.
TBL leh Ryders inkhel hi MSL ṭanna chauh a ni a, tun season
aṭangin semifinal leh relegation playoff a awm dawn. League stage hi March 18, 2016-a tawp tur a nih chauh avangin season tluanin inkhel a pawimawh dawn a, player leh mipui tan insiamṭhatna hun a la tam hle.